Монгол Улсын Ерөнхийлөгч Ухнаагийн Хүрэлсүх 2025 оны гуравдугаар сарын 9-өөс 14-ний өдрүүдэд Бүгд Найрамдах Чех Улс болон Бүгд Найрамдах Польш Улсад төрийн айлчлал хийнэ.
Монгол Улс, Бүгд Найрамдах Чех Улс хооронд дипломат харилцаа тогтоосны 75 жилийн ойн хүрээнд Монгол Улсын Төрийн тэргүүний түвшинд Бүгд Найрамдах Чех Улсад 10 жилийн дараа төрийн айлчлал хийх гэж байна.
Монгол Улсын Ерөнхийлөгч У.Хүрэлсүхэд Бүгд Найрамдах Чех Улсын Сенатын танхимын дарга, Төлөөлөгчдийн танхимын дарга болон Ерөнхий сайд нар тус тус бараалхана.
Мөн хоёр орны уламжлалт, найрсаг харилцааны түвшнийг ахиулж, боловсрол, байгаль орчин, хөдөө аж ахуй, спорт, хууль эрх зүй зэрэг чиглэлээр Засгийн газар хоорондын хэлэлцээр болон байгууллага хоорондын хамтын ажиллагааны баримт бичгүүдэд талууд гарын үсэг зурахаар төлөвлөж байна.
Айлчлалын хүрээнд Прага хотноо Морин хуур найрал хөгжмийн тоглолт, бизнес форум болно. Мөн төрийн айлчлалд оролцож буй үйлдвэрлэгчид тус улсын үйлдвэрүүдтэй танилцах Баялаг бүтээгч-Бизнес аяллыг зохион байгуулна. Мөн хоёр улсын Төрийн тэргүүн нарын ивээл дор Чехийн Үндэсний музейд дэлгэгдэх “Чингис хаан” олон улсын үзэсгэлэнг нээнэ.
Монгол Улсын Ерөнхийлөгч У.Хүрэлсүх Бүгд Найрамдах Польш Улсад төрийн айлчлал хийнэ
Монгол Улсын Ерөнхийлөгч Ухнаагийн Хүрэлсүх Бүгд Найрамдах Польш Улсын Ерөнхийлөгч Анджей Дудагийн урилгаар 2025 оны гуравдугаар сарын 13-14-ний өдрүүдэд тус улсад төрийн айлчлал хийнэ. Энэ онд хоёр улсын хооронд дипломат харилцаа тогтоосны 75 жилийн ойг тохиолдуулан Монгол Улсын төрийн тэргүүний түвшинд Бүгд Найрамдах Польш Улсад 12 жилийн дараа хийж буй төрийн айлчлал юм.
Айлчлалаар уламжлалт, найрсаг харилцааны түвшнийг ахиулахын зэрэгцээ эрүүл мэнд, хөдөө аж ахуй, боловсрол, шинжлэх ухаан, палеонтологи, археологи, хэвлэл мэдээлэл, соёл, кино урлаг зэрэг чиглэлээр хамтын ажиллагааны 10 гаруй баримт бичигт гарын үсэг зурахаар төлөвлөж байна. Түүнчлэн Варшав хотноо Морин хуур найрал хөгжмийн тоглолт, бизнес форум болохоос гадна тус улсын үйлдвэрүүдтэй танилцах Баялаг бүтээгч-бизнес аяллыг зохион байгуулна.
Монгол Улсын Ерөнхийлөгч Ухнаагийн Хүрэлсүх 2021 оноос хойш хийж буй төрийн айлчлалдаа баялаг бүтээгч, бизнес эрхлэгчдийг оролцуулж, гадаад харилцааг нь тэлэх, бизнесийн боломжийг нэмэгдүүлэхэд ихээхэн анхаарч, дэмжиж ирсэн. Өнөөдрийн байдлаар төрийн тэргүүний айлчлалд 1000 орчим баялаг бүтээгч, бизнес эрхлэгчид хамрагдсан бөгөөд тэд тухайн улсын үйлдвэрлэгчдээс сайн туршлага хуримтлуулах, бүтээгдэхүүн экспортлох, харилцан ашигтай хамтын ажиллагааг эхлүүлэх гэрээ хэлэлцээрүүдийг хийсэн байна.
Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Чех Улс, Бүгд Найрамдах Польш улсад хийх төрийн айлчлалд хүнс, хөдөө аж ахуй, эрүүл мэнд, барилга зэрэг тэргүүлэх салбарын 70 орчим аж ахуйн нэгжийн 100 гаруй бизнес эрхлэгчид оролцоно.
Энэ удаагийн Төрийн айлчлалтай холбогдуулан Монгол Улсын Ерөнхийлөгчийн Тамгын газар, Гадаад харилцааны яам, Монголын Үндэсний Худалдаа Аж үйлдвэрийн танхимаас зохион байгуулалттай холбоотой мэдээлэл өгөх уулзалтыг /2025.03.07/ гадаад харилцааны яамны “Зөвшилцөл” танхимд зохион байгууллаа. Тус уулзалтад Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Гадаад харилцааны яамны Олон улсын худалдаа эдийн засгийн газрын дарга Г.Өлзийсайхан, МҮХАҮТ-ын Ерөнхийлөгч Л.Төр-Од нарын албаныхан оролцов.
Монгол Улсын Ерөнхийлөгч Ухнаагийн Хүрэлсүхийн санаачилсан Хүнсний хувьсгал, Эрүүл монгол хүн, Тэрбум мод, Цагаан алт, Монгол Улсын Засгийн газраас хэрэгжүүлж буй Шинэ хоршоо, Атрын IV аян зэрэг хөдөлгөөнүүд эрчимтэй өрнөж байгаа энэ үед тус салбарын баялаг бүтээгч, бизнес эрхлэгчдийг гаднын зах зээлд гарах боломжийг нээж, төрийн айлчлалд оролцуулж байгаа нь томоохон дэмжлэг хэмээн үйлдвэрлэгчид үзэж байна
