Монгол Улсын Ерөнхийлөгч Ухнаагийн Хүрэлсүхийн Бүгд Найрамдах Польш Улсад хийж буй төрийн айлчлал үргэлжилж байна. Энэ удаагийн айлчлалаар хоёр улс уламжлалт найрсаг харилцаагаа шат ахиулан “Иж бүрэн түншлэл”-ийн түвшинд хүргэсэн түүхэн айлчлал болж байна.

Монгол Улсын Ерөнхийлөгчийн айлчлалын хүрээнд “Польш-Монголын бизнес форум” зохиогдож, хоёр улсын 200 гаруй бизнесийн төлөөлөл оролцов. Форумыг БНПУ-ын Ерөнхийлөгч Анджей Дуда, Монгол Улсын Ерөнхийлөгч Ухнаагийн Хүрэлсүх нар нээж үг хэлэв. Төрийн тэргүүн нар хэлсэн үгэндээ: Польш, Монголын харилцаа, хамтын ажиллагааг өргөжүүлж, худалдааны эргэлтийг хоёр дахин нэмэгдүүлэхийг цохон тэмдэглэлээ.

Аж үйлдвэрлэл, үйлчилгээ хөдөө аж ахуй, металлурги, уул уурхай бол тус улсын эдийн засгийн голлох салбар. Тиймээс дээрх чиглэлүүдэд Монгол Улстай хамтран ажиллах бүрэн боломжтой аж.

Бүгд Найрамдах Польш Улсад Гадаадын шууд хөрөнгө оруулалтын хэмжээ жил ирэх бүр өсөж, 3.7 еврод хүрчээ. Европын холбоо дотроо эдийн засгаараа эхний зургадугаар байрт бичигддэг тус улстай Монгол Улс нийгэм, эдийн засаг, хүнс, хөдөө аж ахуй зэрэг бүхий л салбарт хамтран ажиллахад таатай.

Хоёр улсын хамтарсан бизнес форумын үеэр “B2B” уулзалт зохион байгуулагдаж, бизнес эрхлэгчид хамтын ажиллагаагаа эхлүүлэх шинэ түншээ олж байлаа. Улмаар барилга, эрүүл мэнд, хүнс, хөдөө аж ахуйн салбарынхан бизнесийн болон хөрөнгө оруулалтын гэрээ, хэлэлцээрүүдийг амжилттай байгуулав.

Монгол Улсын Ерөнхийлөгчийн санаачилсан “Хүнсний хувьсгал” “Тэрбум мод” “Эрүүл Монгол хүн” “Цагаан алт” зэрэг үндэсний хөдөлгөөний хүрээнд хүнс, хөдөө аж ахуйн салбарын бизнесийн төлөөллийг тус орны бизнес эрхлэгчидтэй түншлэх, гэрээ хэлэлцээр байгуулах, бизнесийн шинэ боломжийг нээсэн үр дүнтэй бизнес форум болж өндөрлөлөө.