Та бүхэн энэ гэрээг хийхээсээ өмнө макро түвшний судалгаа хийсэн үү? Энэ гэрээ Монголд ямар ашигтай вэ? Евразийн эдийн засгийн хэлэлцээрийг байгуулахаас өмнө ЭЗХЯ горимын алдаа гаргасан. Энэ гэрээний талаарх мэдээллийг бид сүүлд авч, хүнсний салбарынхан түргэн авсан шүү дээ. Энэ гэрээ манай хөдөө аж ахуйн салбарыг дампууруулах эрсдэлтэй байв.
Манай улс дэлхийн өндөр хөгжилтэй орнуудтай эдийн засгийн түншлэл байгуулахад хэт эрт байна. Учир нь 10 жилийн өмнө Японоос 300 сая ам.долларын импорт авдаг байсан бол одоо нэг тэрбум ам.долларыг давсан. Харин манай экспорт 10 сая ам.доллар хэвээрээ. Бид тус улс руу хөдөө аж ахуйн бүтээгдэхүүн гаргахаар ХАА-н яамны мэргэжилтнүүдтэй нь уулзахад нааштай хүлээж авдаггүй.
Тус улс манайд хүмүүнлэгийн туслалцаа их үзүүлдэг боловч приус машинаа Монголд л авчирч хаяж байна. Хүн ам багатай, ядуу улс атлаа япон машин худалдан авсан тоогоороо Монгол гуравдугаарт ордог. Япон хожиж, бид хожсонгүй.
Эхний алдаагаа засаагүй атлаа дараагийн гэрээг байгуулах гэж байна. Японтой байгуулсан гэрээг цуцлах хэрэгтэй.
Монголоос БНСУ руу малын тэжээл худалдах, жилдээ 500 сая ам.долларын худалдаа хийх боломж бий. Бид үүнийг туршсан. Хорио цээрийн нөхцөл нь боломжийн. Гэрээнд баталгаат худалдан авалтын талаар заавал тусгах шаардлагатай.
ЭЗХЯ-ны Макро эдийн засгийн бодлогын газрын дарга Л.Энх-Амгалан:
“БНСУ-тай байгуулах гэрээний үйлчилгээний салбарын заалтууд дээр би түлхүү ажиллаж байна. Японтой байгуулсан гэрээнд монголоос экспортлох барааны орцын хэдэн хувийг Монголоос хангах тухай заасан юм билээ. Энэ шалгуур өндөр байсныг бид БНСУ-тай гэрээнд бууруулсан.
Урьдчилсан судалгаагаар манай гурвдагч хөрш болох БНСУ-тай эдийн засгийн түншлэл тогтоох нь ашигтай гэсэн дүгнэлт гарсан тул Засгийн газраас гэрээ байгуулахаар шийдсэн” гэж хариулав.
