Монгол Улсын Ерөнхийлөгчийн Тамгын газрын даргын 2025 оны 02 дугаар сарын 13-ны өдрийн 29 дүгээр захирамжаар байгуулагдсан ажлын хэсгийн II-р хурал боллоо.
Хурлыг нээж ажлын хэсгийн ахлагч Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, УИХ-ын гишүүн, Байгаль орчин , Хүнс, Хөдөө аж ахуйн байнгын хорооны дарга Б.Бейсен нар үг хэлж, яам, агентлагийн хяналт шинжилгээ, үнэлгээний газрын дарга нар болон бусад албан тушаалтнууд хуралдлаа.
Тус ажлын хэсэг нь Улсын Их Хурлын 2022 оны “Хүнсний хангамж, аюулгүй байдлыг хангах талаар авах зарим арга хэмжээний тухай ” 36 дугаар тогтоолын хэрэгжилтэд хийсэн хяналт шинжилгээний мэдээлэлд үндэслэн зорилтот түвшинд хүрч байгаа эсэх, хүрээгүй бол шалтгаан нөхцөлийг тодорхойлж, үр дүнг сайжруулах дүгнэлт, зөвлөмж боловсруулж, холбогдох байгууллагуудад хүргүүлж, хэрэгжилтийг хангахад анхаарч ажиллах юм.
Өнөөдрийн хуралд ХХААХҮЯ-ны Бодлого, төлөвлөлтийн газрын дарга Ц.Болорчулуун, УИХ-ын Тамгын газрын Хяналт, шалгалтын газрын ахлах референт Д.Энхмаа нар “Хүнсний хувьсгал” хөдөлгөөн өрнүүлэх болсон шалтгаан, хүнсний хангамжийн суурь түвшин, 36 дугаар тогтоолын хэрэгжилтэд хийсэн хяналт шинжилгээ, үнэлгээний тайланг танилцуулж, хэлэлцүүллээ.
Цаашид хийж хэрэгжүүлэх шаардлагатай ажлууд:
- Хууль, тогтоомжийн хэрэгжилтийн байдалд хяналт, шинжилгээний нийт үзүүлэлтээ бодитоор хийх
- Хууль, тогтоомжийн хэрэгжилтийн нийцэлд дүн шинжилгээ хийх, эдийн засгийн үр нөлөөний тооцоог хийх
- Хэрэгжилтийн үр дагаварт үнэлгээ хийх, ажлыг 2025 оны жилийн эцсийн байдлаар гаргах
- Хэрэгжилтийн үр дагаврын үнэлгээний тайлан, цаашид авах арга хэмжээний саналыг боловсруулах, ҮАБЗ-д танилцуулах
