Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр МУ-д Гадаад Худалдааг Хөгжүүлэх Төслийн зөвлөх Карл Круг болон холбогдох албаны хүмүүсийг хүлээн авч уулзлаа. Уг төсөл 2023-2027 онд хэрэгжих юм.
“Монгол Улсад гадаад худалдааг дэмжих төсөл” нь худалдааг хөнгөвчлөх, жижиг, дунд бизнес эрхлэгчдийг европын зах зах зээлд нэвтрэх боломжийг бүрдүүлэх, тулгарч буй тарифын бус саад тотгорыг тодорхойлон шийдвэрлэхэд дэмжлэг үзүүлнэ.
Мөн монгол орны хөрсөнд ургасан чацаргана, хатаасан борц, ингэний сүү, ааруул зэрэг хүнсний бүтээгдэхүүний боловсруулалтыг сайжруулан, олон улсад экспортод гаргах бүрэн боломжтой юм.
Төслийн зөвлөх Карл Круг:
“2023-2027 онд хэрэгжих Монгол Улсад гадаад худалдааг хөгжүүлэх төсөл /ITDM/ нь Европын холбоо болон бүс нутгийн зах зээлд Монголын жижиг дунд үйлдвэрлэлийн худалдааны үр ашгийг нэмэгдүүлэхийн зэрэгцээ тогтвортой, шинэлэг бүтээгдэхүүн, үйлчилгээнд онцгой анхаарч, Монгол Улсын гадаад худалдааны эрх зүйн орчныг сайжруулахад дэмжлэг үзүүлэх, олон улсын шаардлагад нийцсэн, нэмүү өртөг шингэсэн, уул уурхайн бус салбарын экспортын бүтээгдэхүүн үйлдвэрлэлийг нэмэгдүүлэх зорилготой”-г тодотгосон юм.
Үүний зэрэгцээ уг төслийн хоёр дахь зорилт нь төр хувийн хэвшлийн уялдаа холбоог сайжруулахын тулд “Хүнсний хувьсгал” үндэсний хөдөлгөөнтэй хамтран ажиллаж, цаашид кластерын системийг хөгжүүлснээр хүнсний бүтээгдэхүүний экспортыг нэмэгдүүлэхийг зорьж буйгаа онцлов.
- Төслийн эхний тусгай зорилт нь тогтвортой байдал, уур амьсгалтай холбоотой, экспортын чадавх өндөртэй, тогтвортой бөгөөд шинэлэг салбаруудад онцгой анхаарал хандуулж, худалдааны бодлогын үр нөлөөг нэмэгдүүлэх юм.
- Хоёр дахь тусгай зорилт нь Европын Холбоо (EX) болон бүс нутгийн зах зээлд Монголын жижиг, дунд үйлдвэр (ЖДҮ)-ийн худалдааны үр ашгийг нэмэгдүүлэх юм.
