Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр МҮХАҮТ-ын ерөнхийлөгч Л.Төр-Од болон ТХАА-ны газрын дарга Ц.Батзул, ЭЗХЯ-ны Эдийн засгийн хамтын ажиллагаа, худалдааны нэгдсэн бодлогын газрын дарга П.Чандмань нарыг хүлээн авч уулзлаа.
Уулзалтаар төрийн байгууллагуудын дотоодын үйлдвэрлэлээр хангах боломжтой чанар, стандартын шаардлага хангасан барааг дотоодын үйлдвэрээс худалдан авах ажлыг “Хүнсний хувьсгал” үндэсний хөдөлгөөнтэй хамтран зохион байгуулах төлөвлөгөөг хэлэлцэж, санал солилцлоо.
Төрийн худалдан авах ажиллагааг хоёр жилийн өмнө хөнгөн үйлдвэрийн чиглэлээр явуулж байсан бол энэ жилээс эхлэн хүнсний салбарт зохион байгуулахаар болж байгаа юм. Аливаа улс орны эдийн засгийн гол цөм нь үндэсний үйлдвэрлэл байдаг бөгөөд улс орнууд үндэсний үйлдвэрлэл дээрээ түшиглэн хөгжиж байдаг.
Төрийн худалдан авалтыг үндэсний хүнс үйлдвэрлэлд чиглүүлснээр хүнсний эрүүл ахуй, цаашлаад экспортод чиглэсэн үндэсний үйлдвэрлэлүүд хөгжиж бий болох эх суурь нь тавигдах юм.
Ингэхдээ дараах байгууллагуудтай хамтарна.
- Ерөнхийлөгчийн Тамгын газар
- Хүнс, хөдөө аж ахуй, хөнгөн үйлдвэрийн яам
- Эдийн засаг хөгжлийн яам
- Төрийн худалдан авах ажиллагаа
- Монголын үндэсний худалдаа аж үйлдвэрийн танхим
