Энэ жилийн аялал жуулчлалын улирлыг эхлүүлж, дөрөвдүгээр сарын хоёр дахь долоо хоногт үндэсний болон олон орны хоолны соёлыг иргэд, жуулчдад таниулах “UB food” фестивалийг 4000 хүний багтаамжтай асарт нийслэлийн Засаг даргын Тамгын газраас санаачлан зохион байгуулж байна. “UB food” фестиваль энэ сарын 8-14-ний өдрүүдэд Сүхбаатарын талбайд болно. Энэ удаагийн фестивалиар Бүгд найрамдах Узбекистан улсын 10 мэргэжлийн тогооч, 20 гаруй сургууль, цэцэрлэгийн хоол үйлдвэрлэлийн ажилчид, сайн дурынхны бүрэлдэхүүнтэй 100 гаруй хүн оролцож, Узбекистан хоолны амт, соёлыг түгээж байна. Мөн Монголын бурхан шашинтны төв Гандантэгчинлэн хийдийн лам нар нэг тонн хэмжээтэй ширмэн тогоонд гурилтай шөлийг уламжлалт аргаар бэлтгэж, монгол хоолны соёлыг түгээх юм.
Энэ үеэр Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хувьсгал” үндэсний хөдөлгөөний хүрээнд 3200 гаруй аж ахуй нэгж, иргэн бага хүүтэй, урт хугацаатай зээл аван үйлдвэрлэл явуулж байна. Уг фестивалид тус аж ахуй нэгж, хоршоодоос мах, нарийн ногоо зэрэг хүнсний бүтээгдэхүүнийг ХХААХҮЯ-тай хамтран гэрээлж, татан авалт хийж буй юм.
Ингэснээр үндэсний хүнс үйлдвэрлэгчдийн борлуулалтын орлогыг нэмэгдүүлэх ач холбогдолтой юм.
Өдөрлөгт хүрэлцэн ирсэн иргэд олон үндэстний амтат хоолыг мастер тогоочдын бэлтгэснээр төрөлх амт, жорынх нь дагуу амтлах боломжтой. Жишээлбэл, Узбекистан үндэстний алдарт плов, шашлык, казань кебаб, самса тэргүүтнийг Узбек мастер тогооч өөрийн жорын дагуу бэлтгэж, иргэд, жуулчдад таниулж байна. Энэ нь монголын тогооч нараа олон улсын хоол үйлдвэрлэлийн техникт суралцуулан бэлтгэх мөн дээр нь үндэсний хүнс хөдөө аж ахуйн салбарт ажиллаж байгаа компаниудын борлуулалтыг дэмжих гэх мэт кластераар, өртгийн сүлжээгээр ажиллах боломжийг бүрдүүлж байна” гэв.
“UB food” фестивалиар Узбекистан, Монгол хоолыг онцлох хэдий ч бусад олон орны хоолны соёл, амт чанар, стандартыг хоол үйлчилгээний салбарт нэвтрүүлж, иргэдэд танилцуулах, жуулчдын анхаарлыг татах олон сонирхолтой үзүүлбэрийг бэлтгээд байна. Цаашид “UB food” олон орны хоолны фестивалийг тусгай чиглэлийн аялал жуулчлалыг хөгжүүлэхэд чухал ач холбогдолтой байхаар тогтмол зохион байгуулна.
