Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Баянхонгор аймгийн Баянхонгор суманд “Хүнсний хангамж, аюулгүй байдал” үндэсний хөдөлгөөний хүрээнд аймагтаа хиам, махан бүтээгдэхүүн үйлдвэрлэгч “Баян жаргант хүнс” ХХК-ний үйл ажиллагаатай танилцлаа. 

Тус үйлдвэр нь долоон төрлийн хиам, найман төрлийн мах, утсан мах зэргийг үйлдвэрлэж, Баянхонгор аймгийн мах, махан бүтээгдэхүүн, хиам, утсан махны 50 хувийг хангах хүчин чадалтай бөгөөд 18 суманд бүтээгдэхүүнээ түгээж байна. Ингэхдээ өөрсдийн үхрийн фермээс түүхий эдээ авч, өдөр бүр шинэ, эрүүл хүнсээр бүтээгдэхүүнээ үйлдвэрлэдэг.

“Баян жаргант хүнс” ХХК-ний захирал З.Шарав:

“Хүнсний хувьсгал” хөдөлгөөний хүрээнд олгогддог хөнгөлөлттэй зээлийг авч үйлдвэртээ бүрэн тоног төхөөрөмжийн шинэчлэлт хийсэн. Мөн үхрийн фермээ өргөжүүлж, түүхий эдийн асуудлаа шийдсэнээр бүтээгдэхүүний гарц, борлуулалт гурав дахин нэмэгдэн нутгийн брэнд бүтээгдэхүүн болж чадсан юм. Хөдөө орон нутагт шинэ, эрүүл аюулгүй хүнсний бүтээгдэхүүн худалдаж авна гэдэг маш хэцүү. Учир нь тээвэрлэлтийн хугацаанд бүтээгдэхүүний онцлогоос шалтгаалан амт чанарт өөрчлөлт орох, үнэ нэмэгдэх асуудал байдаг.

“Хүнсний хувьсгал” хөдөлгөөн орон нутагт хүнс үйлдвэрлэгчдийг бодлогоор дэмжин урамшуулж байгаа нь жижиг дунд үйлдвэрлэгчдэд өндөр өгөөж өгсөн үр дүнтэй ажил болж байна.

“Баян жаргант хүнс” ХХК нь “Хүнсний хангамж, аюулгүй байдал” үндэсний хөдөлгөөний хүрээнд олгож буй хөнгөлөлттэй зээлд хамрагдан үйлдвэрээ бүрэн автомат техникээр тоногжуулж, хүчин чадлаа гурав дахин нэмж чаджээ.
Мөн 17 хүнийг ажлын байраар хангахаас гадна, өдөртөө гурван тонн мах, махан бүтээгдэхүүн үйлдвэрлэж зах, худалдааны төвүүдэд борлуулж байгаа юм. Цаашид 100 хувь хүний оролцоогүй бүрэн ухаалаг тоног төхөөрөмжийг суурьлуулан шинэчлэлт хийхээр төлөвлөж байна.