Аймаг, орон нутагт “Хүнсний хангамж, аюулгүй байдал” үндэсний хөдөлгөөний хэрэгжилт, үр дүнтэй танилцах анхдугаар “Зөвлөлдөх уулзалт” Баянхонгор аймагт боллоо.

Уулзалтыг нээж Баянхонгор аймгийн засаг дарга Д.Мөнхсайхан үг хэлж, аймгийн хүнсний салбарын үйл ажиллагааг танилцуулаа. Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хэрэгжилтийн явц, үр дүнг танилцуулж, үндэсний үйлдвэрлэгчидтэй санал солилцлоо.

Баянхонгор аймагт 24 хүнсний үйлдвэр, аж ахуй нэгж “Хүнсний хувьсгал”-ын хүрээнд олгогддог хөнгөлөлттэй зээлд хамрагдаж, аймгийн дотоодоосоо хангах хүнсний бүтээгдэхүүний хүртээмжийг өсгөхөөр хамтран ажиллаж байна.

Мөн орон нутгийн хүнсний салбарын баялаг бүтээгчид Бүсчилсэн хөгжлийн бодлогын хүрээнд “Хүнсний хувьсгал” үндэсний хөдөлгөөний 2 дугаар шатыг эхлүүлэн эрчимжүүлж, жижиг дунд үйлдвэрлэлийг дэмжих хэрэгтэйг хэлж байв.

Мөн ингэний сүү, сүүн бүтээгдэхүүний үйлдвэрлэл, малын тэжээлийн тариалалт, хүнсний ногоо, махны зоорийг кластераар хөгжүүлж, экспортод гаргахыг зорьж байна. Ингэхдээ ингэний хуурай сүү, сүүн чихэр зэргийг үйлдвэрлэх төслийг хийж, бэлэн болгожээ. Мөн 6000 м.кв орчим хүлэмжийн аж ахуйг барьж, тоног төхөөрөмж, 1000 м.кв дөрвөн улирлын зоорийг бүтээн байгуулсан байна.

Баянхонгор аймгийн засаг дарга Д.Мөнхсайхан:

“Баянхонгор аймгийн хүнсний үйлдвэр, аж ахуйг кластераар хөгжүүлэхийг зорьж, хэрэгцээтэй суурь баазыг бэлдсэн байна. Одоо бидэнд үйлдвэрлэсэн бүтээгдэхүүнээ зах зээлд гаргах үлдэж байна. “Хүнсний хувьсгал” хөдөлгөөний хүрээнд олгогддог зээл өндөр үр дүнтэй байсан.

Хөдөө, орон нутагт зээлийн хуваарилалт, хүртээмжийн асуудал сайнгүй байна.

Тиймээс “Хүнсний хувьсгал”-ын Хоёр дугаар шатыг эхлүүлж орон нутгийн үйлдвэрлэгчдэд тэгш, хүртээмжтэй боломж олгох, мөн аймгууд дотоодын ногоо, жимс, мах махан бүтээгдэхүүн зэргийг хэрэглэж, эрүүл хүнсээр хангагдах шаардлага нэн тэргүүнд байна.”