Дундговь аймгийн төв Мандалговийн ундны ус хангамжийн шугамд усыг зөөлрүүлж, ионжуулан бактери устгах зориулалттай төхөөрөмж суурилуулжээ. 2022 оноос тус аймагт төв суурин газрын 68 уст цэгийн ундны усанд нарийвчилсан шинжилгээ судалгаа хийж, энэхүү судалгааны дүнд үндэслэн ус цэвэршүүлэх төхөөрөмж суулгах ажлыг шат дараатай хийж байна. Аймгийн төвийн хувьд иргэдийн эрүүл мэндийн хамгийн тулгамдсан асуудал нь ундны ус хатуулаг өндөртэй, хлоржуулах төхөөрөмж байхгүйгээс элдэв өвчин гарах эрсдэлтэй байсан юм.
Ийнхүү төхөөрөмж суурилуулснаар аймгийн төвийн айл өрхүүд ирэх долоо хоногоос ундны усыг цэвэршүүлэлгүйгээр шууд хэрэглэх боломж бүрдэж байна.
