Дархан-Уул аймгийн хэмжээнд үйл ажиллагаа явуулж буй томоохон зах, худалдааны төвийн хүнсний бүтээгдэхүүний чанар, аюулгүй байдалд төлөвлөгөөт бус хяналт, шалгалт хийж байна. Дархан-Уул аймгийн Засаг даргын захирамжаар байгуулсан ажлын хэсгийг Стандарт хэмжилзүйн хэлтсийн дарга ахалж, ХХААГ, Хүнсний аюулгүй байдал, үндэсний лавлагаа, лабораторийнхон багтжээ.
Шалгалтын хүрээнд иргэдийн хүнсний хэрэглээнд нийлүүлж буй импортын болон дотоодод тарьж ургуулсан төмс, хүнсний ногоо, жимс жимсгэнэ, хүлэмжийн тариалалтын бүтээгдэхүүний чанар, аюулгүй байдал, пестицидийн үлдэгдлийн лабораторийн шинжилгээ хийж, гарал үүслийг тодорхойлж, бусад холбогдох шаардлагад нийцэж байгаа эсэхийг шалгаж байна. Зөрчил илэрсэн тохиолдолд тухайн зөрчлийг арилгах, устгах, хураах үнэлэлт, дүгнэлт өгч сануулах, торгох арга хэмжээ авах юм.
Энэ сарын 9-ний өдөр СХЗГ-ын даргаар ахлуулсан ажлын хэсэг Дарханд ажиллаж хүнсний аюулгүй байдлын чиглэлээр хяналт шалгалт хийсэн. Шалгалтаар зарим төрлийн хүнсний ногоо, жимснээс пестицид илэрсэн гэсэн лабораторийн урьдчилсан дүгнэлт гарсан байна. Нийт 100 гаруй бүтээгдэхүүнээс дээж авч шинжилгээнд хамруулж баталгаажуулахаар ажиллаж эхэллээ. Шинжилгээний хариу 7-10 хоногт гарах бөгөөд эрсдэлтэй бүтээгдэхүүнүүдийг түр хураан авах арга хэмжээг авч ажиллаж байна.
Хүнсний бүтээгдэхүүний чанар аюулгүй байдалд тавигдах хил гаалийн хяналтыг сайжруулах хэрэгтэйг албаныхан хэлж байна. Мөн иргэд бараа бүтээгдэхүүнээ худалдан авахдаа шинжилгээний бичиг, хадгалалт, хамгаалалт, үйлдвэрлэсэн он сар өдрийг нягталж үзэж байхыг анхаарууллаа.
