Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хангамж, аюулгүй байдал” үндэсний хөдөлгөөний хүрээнд үйл ажиллагаа эхлүүлж буй “Хатан мээж хайрхан” ХХК-ийн махны үйлдвэрийн байртай танилцлаа.
Тус үйлдвэр нь бага хүүтэй, урт хугацаатай хөнгөлөлттэй зээлд хамрагдан нутгийн иргэдийг эрүүл ахуйн шаардлага хангасан мах махан бүтээгдэхүүнээр хангах зорилгоор махны үйлдвэрийн байраа барьж, зургаа дугаар сард үйл ажиллагааг эхлүүлэхээр ажиллаж байгаа юм. Ингэхдээ малын хашаа, таван га тэжээл тариалалтын талбай зэргийг бэлдэн стратегийн ач холбогдолтой махны үйлдвэрийг кластераар хөгжүүлэхээр төлөвлөж байна.
Мөн Бүсчилсэн хөгжлийн бодлогын хүрээнд Булган аймагт хөдөө аж ахуйн салбарыг хөгжүүлэх Үйлдвэр технологийн паркыг байгуулах бөгөөд эрүүл ахуйн шаардлага хангасан мах, сүү сүүн бүтээгдэхүүнээр Хойд бүсийн иргэдийг хангахын зэрэгцээ түүний дагалдах баялаг арьс шир боловсруулах ноос угаах зэрэг үйлдвэрүүдийг барихаар төлөвлөөд буй. Уг Үйлдвэр технологийн паркын төлөвлөгөөнд “Хатан мээж хайрхан” ХХК-ийн махны үйлдвэр багтжээ.
