Судан, Өмнөд Судан, Йемен, Палестин улсууд өлсгөлөнгийн хамгийн өндөр эрсдэлтэй бүс хэвээр байгаа бол Нигерийн зүүн хойд хэсэг болон Сомали улс цочмог өлсгөлөн гамшгийн түвшинд хүрэх эрсдэлтэй бүсүүдийн жагсаалтад шинээр нэмэгджээ.

Нэгдсэн Үндэстний Байгууллагын Хүнс, хөдөө аж ахуйн байгууллага (FAO) болон Дэлхийн хүнсний хөтөлбөр (WFP) байгууллагуудын мэдээлснээр, 2026 оны зургаадугаар сараас арваннэгдүгээр сарын хооронд “өлсгөлөнгийн халуун цэг” гэж тодорхойлогдсон 13 улсад олон сая хүний хүнсний хурц дутагдал улам даамжрах төлөвтэй байна.

Хоёр жил тутам гаргадаг “Өлсгөлөнгийн халуун цэгүүд” тайланд Судан, Өмнөд Судан, Йемен, Палестин улсуудыг дэлхийн хамгийн ноцтой өлсгөлөнгийн бүсүүдээр нэрлэжээ.

• Нигерийн зүүн хойд хэсэг, тэр дундаа Борно мужид хүн амын тодорхой хэсэг өлсгөлөнгийн гамшгийн түвшин (IPC 5)-д хүрэх эрсдэлтэй байна.
• Сомалийн Бурхакаба дүүрэгт өлсгөлөн (Famine) үүсэх бодит эрсдэл бий болсон байна.

Эдгээр бүс нутгийн хүнсний хямралын гол шалтгаан нь:

• Зэвсэгт мөргөлдөөн, хүчирхийлэл;
• Эдийн засгийн хүндрэлийн цочрол;
• Хүмүүнлэгийн тусламжийн санхүүжилтийн дутагдал;
• Ирэх төлөвтэй байгаа Эль Нино үзэгдлээс шалтгаалсан ган, үер, хур тунадасны жигд бус байдал зэрэг юм.

2022-2025 оны хооронд хүнсний тусламж, яаралтай хөдөө аж ахуйн дэмжлэг, хоол тэжээлийн санхүүжилт 59 хувиар буурсан нь бараг арван жилийн өмнөх түвшиндээ эргэн очжээ. Үүний зэрэгцээ эдгээр улс оронд хүнсний ноцтой дутагдалд өртсөн хүмүүсийн тоо 266 саяд хүрсэн байна.

Хамгийн өндөр эрсдэлтэй бүсүүд

• Судан: 19.5 сая хүн буюу нийт хүн амын 41 хувь нь хүнсний хурц дутагдалтай байна. 200 мянга орчим хүн гамшгийн түвшний өлсгөлөнд нэрвэгдэх төлөвтэй.
• Өмнөд Судан: 7.8 сая хүн буюу хүн амын 55 хувь нь хүнсний хямралын түвшинд хүрээд байна.
• Йемен: 18.3 сая хүн буюу нийт хүн амын талаас илүү нь хүнсний ноцтой дутагдалтай байна.
• Палестин: Газын зурваст 1.6 сая хүн яаралтай тусламж шаардлагатай байгаа бөгөөд энэ нь судалгаанд хамрагдсан хүн амын 77 хувийг эзэлж байна.
• Сомали: 6 сая орчим хүн хүнсний хурц дутагдалд өртөж, зарим бүс нутагт өлсгөлөн нүүрлэх эрсдэл бий болжээ.

Маш өндөр эрсдэлтэй бусад бүсүүд

• Afghanistan – үргэлжилсэн ган, хүнсний өндөр үнэ, мөргөлдөөн.
• Democratic Republic of the Congo – мөргөлдөөн, шилжилт хөдөлгөөн, Эболагийн дэгдэлт.
• Haiti – нөхцөл байдал бага зэрэг сайжирсан ч эмзэг хэвээр байна.
• Myanmar, Mali, Lebanon болон Madagascar улсууд мөн эрсдэлтэй бүсүүдийн жагсаалтад багтжээ.

Тайланд онцолсноор, 2026 оны хоёрдугаар хагаст дэлхийн хамгийн эмзэг бүс нутгуудад өлсгөлөнгийн нөхцөл байдал улам дордох төлөвтэй байгаа бөгөөд эрт арга хэмжээ авах нь хүний амь насыг аварч, амьжиргааг хамгаалах хамгийн үр дүнтэй арга зам хэвээр байна.