РОМ – Дэлхий дахинд өлсгөлөн түүхэн дээд түвшинд хүрээд буй энэ үед АНУ-ын Төрийн департамент НҮБ-ын Дэлхийн хүнсний хөтөлбөрт (WFP) 800 сая ам.долларын шууд санхүүжилт олгохоор болсныг тус байгууллага талархан хүлээн авч байгаагаа мэдэгдлээ.

Энэхүү чухал санхүүжилт нь Дэлхийн хүнсний хөтөлбөрийн яаралтай хүнс, шим тэжээлийн тусламжийн үйл ажиллагааг дэмжиж, дор хаяж 37 улсын 38 сая гаруй хамгийн эмзэг бүлгийн иргэнд хүрэх боломжийг бүрдүүлэх юм. Үүнээс өмнө АНУ НҮБ-ын Хүмүүнлэгийн асуудлыг зохицуулах газрын (OCHA) нэгдсэн сангуудаар дамжуулан 21 оронд хэрэгжүүлж буй яаралтай тусламжийн үйл ажиллагаанд мөн ихээхэн хувь нэмэр оруулаад байсан билээ.

Энэхүү мэдэгдэл нь дэлхий даяар хүнсний хэрэгцээ урьд өмнө байгаагүй хэмжээнд хүрч, өлсгөлөнгийн түвшин дээд цэгтээ хүрсэн цаг үед гарч байна. WFP-ийн тооцоолсноор энэ онд хурц хүнсний хомсдолд өртсөн хүмүүсийн тоо улам өсөх бөгөөд дэлхийн хамгийн эмзэг бүс нутгуудад амьдарч буй сая сая өрх илүү ноцтой өлсгөлөнд нэрвэгдэх эрсдэлтэй байна.

Дэлхийн хүнсний хөтөлбөрийн Гүйцэтгэх захирлын үүрэг гүйцэтгэгч Карл Скау “Хэрэгцээ нь нөөц боломжоосоо давсан энэ үед АНУ-ын энэхүү өгөөмөр дэмжлэг үнэхээр шийдвэрлэх ач холбогдолтой. Энэ нь өлсгөлөнгийн ирмэгт тулсан хүмүүст амин чухал тусламж үзүүлэх, эхчүүд болон хүүхдүүдэд шим тэжээлийн дэмжлэг хүргэх, мөн олон сая хүнийг туйлын өлсгөлөнд автахаас урьдчилан сэргийлэх хүнсний нөөцийг бүрдүүлэхэд үнэтэй хувь нэмэр оруулна. Манай багууд хурдан шуурхай, өргөн хүрээнд ажиллах чадавхтай бөгөөд шаардлагатай санхүүжилттэй бол ил тод, үр ашигтай, хариуцлагатай байдлаар тусламжаа үргэлжлүүлэн хүргэх болно” гэж онцолжээ.

Шинэ санхүүжилтийн хүрээнд WFP дэлхий даяарх ложистикийн өргөн сүлжээ, урьдчилан байршуулсан хүнсний нөөц болон өгөгдөлд суурилсан зорилтот төлөвлөлтөө ашиглан тусламжийг түргэн шуурхай, зардал багатай хүргэх боломжтой болно. Мөн байгалийн гамшигт өртөмтгий улс орнуудад гамшгийн бэлэн байдлыг хангах, яаралтай хариу арга хэмжээ авах чадавхыг сайжруулахад зарцуулагдах бөгөөд Латин Америк, Карибын тэнгисийн бүс, Ази болон Энэтхэг-Номхон далайн орнуудыг хамрах юм. Үүнээс гадна удаан үргэлжилсэн хүмүүнлэгийн хямрал нүүрлэсэн бүс нутгуудад амь насыг аврах хүнсний болон шим тэжээлийн тусламжийг санхүүжүүлэхээр төлөвлөжээ.

Карл Скау “Хамгийн шаардлагатай мөчид хүмүүст тусламж хүргэх боломжийг бүрдүүлж буй АНУ-д бид талархаж байна. Энэхүү хөрөнгө нь Ливанд хурц өлсгөлөнтэй тэмцэх үйл ажиллагаагаа өргөжүүлэх, Гаитид шилжин суурьшсан өрхүүдэд мөнгөн тусламж үзүүлэх, эсвэл Конго Ардчилсан Бүгд Найрамдах Улсын Эбола өвчинд нэрвэгдсэн бүсүүдэд хүнс, ложистикийн хангамжийг нэмэгдүүлэх зэрэг дэлхийн олон орны хүмүүст хүрэхэд зориулагдана. Олон улсын хамтын нийгэмлэг ч энэ санаачилгад нэгдэхийг бид хүсэж байна. Хамтын хүчин чармайлтаар бид өлсгөлөнгийн тархалтыг сааруулж, олон сая хүний амь насыг аврах боломжтой” хэмээн мэдэгдсэн байна.

АНУ-ын энэхүү дэмжлэг нь хоёр талын санхүүжилт хүмүүнлэгийн салбарт ямар чухал үүрэгтэйг дахин харуулж байна. Хэт өлсгөлөн нь олон улсын хэмжээнд орон нутгийн тогтвортой байдлыг алдагдуулж, шилжилт хөдөлгөөн, аюулгүй байдлын эрсдэл, эдийн засгийн хохирол болон хүний амьжиргаанд ноцтой хүндрэл учруулж байгаа юм. Ялангуяа уян хатан нөхцөлтэй санхүүжилт нь томоохон хүмүүнлэгийн гамшигт хариу арга хэмжээ авахын зэрэгцээ гэнэтийн хямралд урьдчилан сэргийлэх арга хэмжээг цаг алдалгүй хэрэгжүүлж, иргэдийн амьжиргааг хамгаалан, тусламжийн нийт өртгийг бууруулахад чухал ач холбогдолтой гэж Дэлхийн хүнсний хөтөлбөр онцолжээ.

Эх сурвалж: https://www.wfp.org/