Лондон, 6-р сарын 26 (Ройтерс) – Их Британийн хүнс, ундаа үйлдвэрлэгчдийн экспорт 2026 оны эхний улиралд өмнөх оны мөн үеэс биет хэмжээгээрээ 8.9 хувиар буурч, COVID-19 цар тахлын оргил үеийг эс тооцвол сүүлийн арван жилийн хамгийн доод түвшинд хүрсэн талаар салбарын холбоо баасан гарагт мэдээллээ.
12 мянга гаруй аж ахуйн нэгжийг төлөөлдөг Хүнс, ундааны холбоо (Food and Drink Federation, FDF) Их Британийн үйлдвэрлэгчид дэлхийн өрсөлдөгчдөдөө зах зээлээ алдаж байгааг онцолж, Засгийн газрыг бизнес эрхлэх өрсөлдөхүйц орчныг бүрдүүлэх, мөн компаниудыг олон улсын худалдааны хэлэлцээрүүдийн үр өгөөжийг хүртэхэд дэмжлэг үзүүлэхийг уриалав.
Үнийн дүнгээр тооцвол 2026 оны эхний улиралд хүнс, ундааны экспорт өмнөх оны мөн үеэс 4.8 хувиар буурч, 5.7 тэрбум фунт стерлинг (7.5 тэрбум ам.доллар) болсон байна.
Харин хүнс, ундааны импорт үнийн дүнгээр 2.6 хувиар өсөж, 16.3 тэрбум фунт стерлингт хүрчээ.
- Европын Холбоо (ЕХ)-руу хийсэн экспорт биет хэмжээгээрээ 6.9 хувиар буурсан нь Brexit-ийн дараа худалдааны зардал, төвөгтэй байдал нэмэгдсэнтэй холбоотой гэж үзжээ.
- ЕХ-ноос хийсэн импорт биет хэмжээгээрээ 1 хувиар буурсан байна.
- АНУ руу хийсэн экспорт үнийн дүнгээр 27.9 хувиар огцом буурсан нь АНУ-аас 2025 онд нэмэлт тариф ногдуулсантай холбоотой гэж тайлбарлажээ.
- Харин АНУ-аас хийсэн импорт үнийн дүнгээр 11.5 хувиар өссөн байна.
FDF мөн Их Британийн Засгийн газраас шоколад, жигнэмэг, чанамал зэрэг бүтээгдэхүүнд тарифын хөнгөлөлт үзүүлэхээр санал болгосон нь “аль хэдийн хүндрэлтэй байгаа нөхцөл байдлыг улам дордуулах эрсдэлтэй” гэж анхааруулав.
Түүнчлэн Их Британид хүнс, ундаа үйлдвэрлэх өртөг, тухайлбал эрчим хүч болон хөдөлмөр эрхлэлтийн зардал нь өрсөлдөгч орнуудтай харьцуулахад өндөр байгаа бөгөөд нэмэгдсэн зохицуулалтын шаардлагууд ч энэ дарамтыг улам өсгөж байгааг онцолжээ.
Ханш: 1 ам.доллар = 0.7602 фунт стерлинг.
Эх сурвалж: REUTERS
