Монгол Улсын Ерөнхийлөгчийн Холбооны Бүгд Найрамдах Герман Улсад хийж буй төрийн айлчлалын хүрээнд Монголын барилгын салбарын төлөөлөгчид Германы хүнсний хангамж, логистикийн салбарын тэргүүлэгч CHEFS CULINAR компанийн орчин үеийн агуулах, логистикийн төвийн бүтэц, технологийн шийдэлтэй танилцлаа.
Тус төвийн барилга угсралтын ажлыг Германы барилгын салбарын томоохон компаниудын нэг, 125 гаруй жилийн түүхтэй STRABAG SE группийн охин компани Ed. Züblin AG гүйцэтгэжээ.
Танилцуулгын үеэр Ed. Züblin AG компанийн Сэргээн засварлалт, шинэчлэлийн салбарын Тамгын газрын дарга, итгэмжлэгдсэн төлөөлөгч Эрик Тойте (Erik Teute) төслийн онцлог, барилгын инженерийн шийдэл болон компанийн үйл ажиллагааны талаар мэдээлэл өглөө.
Ed. Züblin AG нь иргэний болон үйлдвэрлэлийн барилга угсралт, дэд бүтцийн бүтээн байгуулалт, барилгын сэргээн засварлалт, шинэчлэл, эрчим хүчний хэмнэлттэй, тогтвортой барилгын шийдлээр мэргэшсэн бөгөөд Хойд, Зүүн бүсийн салбар нь Берлин, Бранденбург, Саксони-Анхальт мужид жилд ойролцоогоор 400 сая еврогийн өртөг бүхий төсөл хэрэгжүүлдэг ажээ.
Энэхүү танилцах арга хэмжээ нь Монголын барилгын салбарын төлөөлөгчдөд Германы орчин үеийн барилга угсралтын технологи, логистикийн төвийн төлөвлөлт, галын аюулгүй байдлын инженерчлэл, барилгын сэргээн засварлалт, шинэчлэлийн туршлагыг судлах боломж бүрдүүлж, салбарын цаашдын хамтын ажиллагааг өргөжүүлэхэд ач холбогдолтой боллоо.
