Монгол Улсын Ерөнхийлөгч Ухнаагийн Хүрэлсүхийн Холбооны Бүгд Найрамдах Герман Улсад хийж буй төрийн айлчлалын хүрээнд “Герман-Монголын бизнес форум”-ыг 2026 оны 10 дугаар сарын 21-ний өдөр Берлин хотноо зохион байгуулав.
Монголын Үндэсний худалдаа, аж үйлдвэрийн танхим болон Германы Худалдаа, аж үйлдвэрийн танхим хамтран зохион байгуулсан тус форумд хоёр улсын төр, хувийн хэвшил, бизнесийн байгууллагын 270 гаруй төлөөлөгч оролцож, худалдаа, хөрөнгө оруулалт, үйлдвэрлэл, технологийн хамтын ажиллагааг өргөжүүлэх асуудлаар санал солилцов.
Форумыг Германы Худалдаа, аж үйлдвэрийн танхимын Ерөнхий захирал Хелена Мелников, Монгол Улсын Гадаад харилцааны сайд Б.Батцэцэг, МҮХАҮТ-ын Ерөнхийлөгч Б.Лхагважав нар нээж үг хэллээ.
Гадаад харилцааны сайд Б.Батцэцэг Монгол, Германы харилцаа 2024 онд Стратегийн түншлэлийн түвшинд хүрсэн нь эдийн засгийн хамтын ажиллагааг шинэ шатанд гаргах боломж бүрдүүлснийг онцлов. Тэрээр Германы дэвшилтэт технологи, ноу-хауг Монгол Улсын нөөц боломжтой уялдуулан, нэмүү өртөг шингэсэн үйлдвэрлэл, экспортыг хөгжүүлэх, хамтарсан төсөл, хөрөнгө оруулалтыг бодит ажил хэрэг болгох шаардлагатайг тэмдэглэлээ.
МҮХАҮТ-ын Ерөнхийлөгч Б.Лхагважав эрдэс баялгийн боловсруулалт, сэргээгдэх эрчим хүч, хүнс, хөдөө аж ахуй, дэвшилтэт технологийн салбарт хамтын ажиллагааг өргөжүүлэх боломжийг танилцуулав. Түүнчлэн мал аж ахуйн гаралтай түүхий эдийг гүн боловсруулах замаар нэмүү өртөг шингэсэн бүтээгдэхүүн үйлдвэрлэж, Европын зах зээлд нийлүүлэх, Германы технологи, хөрөнгө оруулалт болон мэргэжлийн, хосмог сургалтын туршлагыг Монголын үйлдвэрлэлтэй холбохын ач холбогдлыг онцоллоо.
Форумын хүрээнд хоёр улсын байгууллага, аж ахуйн нэгжүүд худалдаа, хөрөнгө оруулалт, барилгын материал, сэргээгдэх эрчим хүч, хүнсний үйлдвэрлэл болон бизнесийн хамтын ажиллагааг өргөжүүлэх чиглэлээр нийт зургаан баримт бичиг солилцож, гэрээ, санамж бичиг байгууллаа.
Тухайлбал, Монгол Улсын Шадар сайдын Ажлын алба болон Германы Koras PMR GmbH, Олон улсын эдийн засгийн зөвлөл (IWR) болон Герман-Монголын бизнес эрхлэгчдийн холбоо хамтын ажиллагааны баримт бичиг солилцов. Мөн Монголын “GR Precast” ХХК Германы “CBS Home GmbH” компанитай хамтран ажиллах гэрээ байгуулж, “Blackbox Energy” болон “smartOPS GmbH” компаниуд сэргээгдэх эрчим хүчний салбарт хамтран ажиллахаар боллоо.
“GR Precast” ХХК-ийн төсөл нь Монгол орны нөхцөлд тохирсон хөнгөн бетон угсармал барилгын бүрэн автомат үйлдвэр байгуулахад чиглэж байна. Үйлдвэрийн эхний ээлж жилд 120 мянган ам метр талбайн барилгын бүтээгдэхүүн үйлдвэрлэх хүчин чадалтай байхаар төлөвлөжээ. Энэ нь 2,400–3,000 айлын орон сууц барих хэмжээний үйлдвэрлэлийн хүчин чадал бөгөөд төсөл хэрэгжсэнээр барилгын хугацаа, өртгийг бууруулах, эрчим хүчний хэмнэлттэй технологи нэвтрүүлэх, орон сууцны хүртээмжийг нэмэгдүүлэх боломж бүрдэх юм.
Хүнсний үйлдвэрлэлийн салбарт “Хүнс Комплекс” ХХК Германы “Poly-clip System GmbH & Co.” болон “Eberhardt GmbH” компаниудтай тус тус санамж бичиг байгууллаа. Хамтын ажиллагааны хүрээнд үйлдвэрлэлийн технологи, автоматжуулалтыг сайжруулж, бүтээмж, бүтээгдэхүүний чанар, хүнсний аюулгүй байдлыг дээшлүүлэхээр төлөвлөж байна.
Форумын үеэр МҮХАҮТ-ын Ерөнхий нарийн бичгийн дарга Б.Саруул “Монгол Улсын бизнес, хөрөнгө оруулалтын орчин” сэдвээр илтгэл тавьж, Монголын зах зээлийн боломж, хөрөнгө оруулалтын нөхцөл, эрх зүйн орчны талаар танилцууллаа.
Үргэлжлүүлэн Герман-Ази, Номхон далайн бизнесийн холбооны захирал Анна-Лена Шюттегийн чиглүүлсэн панел хэлэлцүүлэг болж, “Чингис хаан баялгийн сан нэгдэл” ХХК-ийн гүйцэтгэх захирал Б.Даваадалай, “Говь Кашмер Европ” ХХК-ийн гүйцэтгэх захирал Ц.Оргилболд, “Олон улсын худалдааны хөгжил” төслийн ахлах зөвлөх Магнус Мюллер, Германы Сэргээн босголтын зээлийн банкны Хятад, Монголын бүс хариуцсан захирал Кристиан Рихтер нар оролцов. Хэлэлцүүлгээр бизнес, хөрөнгө оруулалтын орчныг сайжруулах, хувийн хэвшлийн оролцоог нэмэгдүүлэх, хамтын ажиллагааны санаачилгыг бодит төсөл болгон хэрэгжүүлэх асуудлыг хөндлөө.
Ийнхүү Герман-Монголын бизнес форум нь хоёр улсын Стратегийн түншлэлийг эдийн засгийн бодит хамтын ажиллагаагаар баяжуулах, бизнес эрхлэгчдийн шууд харилцаа, шинэ түншлэлийг өргөжүүлэх, Монголын үйлдвэрлэл, экспортод дэвшилтэт технологи, хөрөнгө оруулалт татахад чиглэсэн чухал арга хэмжээ боллоо.
