“Хүнсний хангамж, аюулгүй байдлыг хангах талаар авах зарим арга хэмжээний тухай” 36-р тогтоолыг 2022 оны 06 дугаар сарын 17-нд УИХ баталсан. Ингэснээр Монгол Улсын Ерөнхийлөгч Ухнаагийн Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөн хэрэгжих боломж бүрдсэн юм.
36-р тогтоолд тусгагдсан 5 бүлэг, 49 заалт, 116 арга хэмжээг хэрэгжүүлэхэд 13 төрийн байгууллага хамтарч, уялдаа холбоотой ажиллах шаардлагатай. Иймд эдгээр байгууллагуудад тогтоолыг хэрэгжүүлэх арга хэмжээ, үйл ажиллагааг танилцуулахаар хүнсний төсөл хөтөлбөр хариуцсан албаны төлөөлөгчид уулзалт зохион байгуулж байна. Энэ хүрээнд Зээлийн батлан даалтын сангийн захирал Ш.Алтанчимэгтэй уулзлаа.
Уулзалтад Хүнсний төсөл, хөтөлбөр хариуцсан албыг төлөөлөн:
- МУ-ын Ерөнхийлөгчийн Үйлдвэр, үйлчилгээний бодлого хариуцсан зөвлөх Ч.Даваабаяр
- ХХААХҮЯ-ны Бодлого төлөвлөлтийн газрын ахлах мэргэжилтэн А.Амаржаргал
- Хүнсний төсөл, хөтөлбөр хариуцсан албаны референт О.Дамдиндулам
- Хүнсний төсөл, хөтөлбөр хариуцсан албаны хэвлэлийн ажилтан Б.Урантуяа
Зээлийн батлан даалтын санг төлөөлөн:
- Зээлийн батлан даалтын сангийн Гүйцэтгэх захирал Ш.Алтанчимэг
- Зээлийн батлан даалтын сангийн Төсөл, бизнес хөгжлийн дарга Э.Тамир
- Монголын үйлдвэр технологийн паркуудын нэгдсэн холбооны тэргүүн н.Батгэрэл
- Хөгжлийн шийдэл ТББ, “БЭСТ” хөтөлбөрийн бизнес зөвлөх Г.Эрдэнэбаяр нар оролцлоо.
Зээлийн батлан даалтын сан 10 жилийн хугацаанд 1102 жижиг, дунд үйлдвэр, үйлчилгээ эрхлэгчдийн зээлд батлан даалт хийжээ. Батлан даалтад хамрагдсан үйлдвэрлэгчдийн дийлэнх нь буюу 69 хувь нь нийслэл хотын харьяалалтай байсан тул хөдөө орон нутгийн үйлдвэр, үйлчилгээ эрхлэгчдэд хүрч ажиллахаар хэд хэдэн судалгаа хийсэн байна.
Судалгааны үр дүнгээс үзэхэд хөдөө орон нутагт ажлын байр бий болгохын тулд үйлдвэрлэл хөгжүүлэх, бизнесийн таатай орчинг бүрдүүлэх шаардлагатай байгааг онцоллоо. Мөн нэн тэргүүнд хүнсний үйлдвэрлэлийг хөгжүүлж, хүнсээ нийслэл хот, хилийн цаанаас хангадаг байдлыг зогсоох хэрэгтэй гэдгийг зөвлөж байв.
2021 онд хуулинд өөрчлөлт орсны дагуу Зээлийн батлан даалтын сан хөдөө орон нутагт шилжин, суурьшиж байгаа болон хөдөө орон нутгийн иргэд тухайн орон нутагтаа орон сууц ипотекийн зээлээр худалдаж авахад 50 хувьд нь батлан даалт хийх болсон. Ийнхүү аймаг сумдад ажлын байр бий болгож, хүнсний хэрэгцээгээ хангах боломжийг нь бүрдүүлж, амьдрах орон сууцыг нь шийдвэрлэж өгснөөр Монгол Улсын хөгжилд томоохон үр дүн гарна гэж үзжээ.
