Монгол Улсын Ерөнхийлөгч У.Хүрэлсүхийн санаачилсан “Хүнсний хангамж, аюулгүй байдал” үндэсний хөдөлгөөний дагуу УИХ-аас 36-р тогтоолыг баталсан. Тус тогтоолыг хэрэгжүүлэх арга хэмжээ, үйл ажиллагааг Эрчим хүчний яаманд танилцуулах уулзалтыг Хүнсний төсөл, хөтөлбөр хариуцсан ажлын алба зохион байгууллаа.
Уулзалтад Эрчим хүчний яамыг төлөөлөн:
- Эрчим хүчний яамны Төрийн нарийн бичгийн дарга Б.Насантогтох
- Эрчим хүчний яамны Цахилгааны хэлтсийн дарга Ш.Ганзориг
- Эрчим хүчний яамны Газрын дарга Т.Батдондог
- Эрчим хүчний яамны Дулааны хэлтсийн ахлах шинжээч Л.Мөнхцог
- Эрчим хүчний яамны Ахлах шинжээч М.Гансүх
Хүнсний төсөл, хөтөлбөр хариуцсан албыг төлөөлөн:
- МУ-ын Ерөнхийлөгчийн Үйлдвэр, үйлчилгээний бодлого хариуцсан зөвлөх Ч.Даваабаяр
- ХХААХҮЯ-ны Бодлого төлөвлөлтийн газрын ахлах мэргэжилтэн А.Амаржаргал
- Хүнсний төсөл, хөтөлбөр хариуцсан албаны референт О.Дамдиндулам
- Хүнсний төсөл, хөтөлбөр хариуцсан албаны хэвлэлийн ажилтан Б.Урантуяа нар оролцлоо.
Эрчим хүчний яам “Хүнсний хангамж, аюулгүй байдал” үндэсний хөдөлгөөний хүрээнд үүрэг хариуцлага хүлээж ажиллахад бэлэн байгаа бөгөөд бусад төрийн байгууллагуудтай уялдаа холбоотой ажиллахаа илэрхийллээ.
Өнөөдрийн байдлаар хүлэмжийн аж ахуй эрхлэгчдийн цахилгааныг 21:00- 06:00 цагийн хооронд чөлөөлөн дэмжлэг үзүүлдэг. Монгол Улсад хүлэмжийн аж ахуй төдийлөн хөгжөөгүй байгаа учир дээрх хөнгөлөлт, чөлөөлөлтийн ажил төсөвт ачаалал өгдөггүй гэлээ.
Цаашид ургац хураалтын үед эрчим хүчээр таслахгүй байх, зоорь агуулахын цахилгааны хэрэглээнд хөнгөлөлт, чөлөөлөлт үзүүлэх зэрэг дэмжлэг хэрэгтэй байгаа юм. Учир нь зоорь, агуулахын өртөгөөс шалтгаалан хүнсний ногооны үнэ өсөх хандлагатай байдаг.
36-р тогтоол нь нийт 5 бүлэг, 49 заалт, 116 арга хэмжээнээс бүрдэх бөгөөд ирэх 5 жилд хүнсний гол нэрийн 19 төрлийн бүтээгдэхүүнийг дотооддоо үйлдвэрлэх, улмаар хүнс экспортлогч улс болох зорилгын хүрээнд хэрэгжих юм. Өөрөөр хэлбэл эх орондоо хүнсний хувьсгал хийж буй түүхэн мөч ажил амжилттай хэрэгжиж эхэллээ. Үндэсний хөдөлгөөний үйл ажиллагааг хариуцсан Хүнсний төсөл, хөтөлбөр хариуцсан албаны даргаар Доктор /PhD/, профессор Ч.Даваабаяр томилогдон ажиллаж байна.
