Хүнс, хөдөө аж ахуй, хөнгөн үйлдвэрийн Сайд Х.Болорчулуун, Дэд сайд Ж.Бат-Эрдэнэ болон тус яамны холбогдох газрын дарга, мэргэжилтнүүд Ерөнхийлөгчийн Хот хөдөөгийн бодлогын зөвлөх О.Буяннэмэх, Үйлдвэр, үйлчилгээний бодлогын зөвлөх Ч.Даваабаяр, Эдийн засгийн бодлого хариуцсан зөвлөх Б.Даваадалай нартай уулзаж, хүнсний хувьсгал хийх зорилт, арга хэмжээг эрчимжүүлэх талаар ярилцлаа.
Үндсэн хууль, Засгийн газрын тухай хуулийг үндэслэн Монгол Улсын Ерөнхий сайд Л.Оюун-Эрдэнэ Засгийн газрын гишүүнийг томилох тухай захирамжид гарын үсэг зурж, шинэ сайд нараа томилсон. Хүнс, хөдөө аж ахуй, хөнгөн үйлдвэрийн сайдаар томилогдсон Х.Болорчулуун хоёр хоногийн өмнө /2022.08.30/ ХХААХҮ-ийн сайд асан З.Мэндсайханаас тамгаа гардан авч, үүрэгт ажилдаа орсон юм. Тэрбээр нэн тэргүүнд Монгол Улсын Ерөнхийлөгчийн санаачилсан “Хүнсний хувьсгал”-ыг эрчимжүүлэх, Эрүүл монгол хүнсээр иргэдээ хангах, Хүнс экспортлогч орон болох зэрэг ажлуудыг хэрэгжүүлэхээр зорьж байна.
Монгол Улсын Ерөнхийлөгчийн санаачилгаар “Хүнсний хангамж-аюулгүй байдал” үндэсний хөдөлгөөнийг хүрээнд манай улс ойрын 5 жилийн хугацаанд 19 нэр төрлийн хүнсээр дотоодын хэрэгцээгээ бүрэн хангах зорилт дэвшүүлэн ажиллаж байгаа бөгөөд 2022 оны 06 дугаар сарын 17-нд УИХ-аас баталсан 36-р тогтоолын ажлын хэсгийг Х.Болорчулуун сайд ахлаж байсан. Цаашид 5 жилийн хугацаанд хэрэгжих “Хүнсний хангамж, аюулгүй байдал” үндэсний хөдөлгөөнд бусад хамтран хэрэгжүүлэх 24 төрийн байгууллагын хамт манлайлж оролцохоо илэрхийллээ.
