Дэлхийн улс орнууд хүнсний баталгаат байдлаа сайжруулахад онцгой анхаарч байгаа энэ цаг үед Монгол Улсын Ерөнхийлөгч У.Хүрэлсүх “Хүнсний хангамж-Аюулгүй байдал”-ын бодлого, зохицуулалтыг үндэсний хэмжээнд эрс сайжруулах санаачилга гаргаж, таван жилийн хугацаанд хэрэгжих үндэсний хөдөлгөөнийг орон даяар өрнүүлээд байгаа билээ.

Монгол Улсын Төрийн Тэргүүн хүнсний аюулгүй байдлыг хангах, хоол тэжээлийг сайжруулах, тогтвортой хүнсний үйлдвэрлэлийг дэмжих чиглэлээр хүчин чармайлтаа эрчимжүүлж байгааг НҮБ-ын Ерөнхий нарийн бичгийн дарга А.Гутерреш төдийгүй НҮБ-ын Хүнс, хөдөө аж ахуйн байгууллагаас сайшаасан.

Жил бүрийн 10-р сарын 16-нд дэлхийн 150 гаруй орны хүмүүс Дэлхийн хүнсний өдрийг хамтдаа тэмдэглэдэг. Энэ жилийн хүнсний өдрийг тохиолдуулаад Монгол дахь НҮБ-ын Хүнс, хөдөө аж ахуйн байгууллагаас Ерөнхий Боловсролын Сургуулийн 10-12 дугаар ангийн сурагчдын дунд “Хүн бүрд эрүүл хоол хүнс хангалттай байж, хэнийг ч ардаа орхиогүй дэлхийг бүтээе“ эссе бичлэгийн уралдаан зарлалаа.

Монгол хүний эрүүл, аюулгүй амьдрах таатай орчин, нөхцөлийг бүрдүүлэх суурь асуудлын нэг бол хүнсний аюулгүй байдлыг хангах, хүнсний хангамжийг нэмэгдүүлэх явдал юм. Хүнс эрүүл байвал монгол хүн эрүүл байна. Монгол хүн эрүүл байвал Монгол үндэстэн хүчирхэг байна. Иймд илүү сайхан, тогтвортой ирээдүйн төлөө хүүхэд залуусын оролцоог нэмэгдүүлэх, хамтын шийдэлд тэдний дуу хоолойг сонсох зорилготой энэхүү уралдаанд хүүхэд залуус та бүхнийг идэвхтэй оролцохыг уриалж байна.

Эссе бичлэгийг 2022 оны 09 дүгээр сарын 26-ны өдрийн 18:00 цаг хүртэл https://forms.gle/Vj6FwNrgCQbbFHYw8 холбоосоор хүлээн авах бөгөөд дэлгэрэнгүй мэдээллийг дараах холбоосоор https://www.fao.org/mong…/news/detail-events/en/c/1603749/ авна уу.