Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр болон Ерөнхийлөгчийн Тамгын газрын Хүнсний төсөл, хөтөлбөр хариуцсан албаны ажлын алба Монголын Үндэсний олон нийтийн радио, телевизийн Ерөнхий захирал А.Бүрэнбаатар болон МҮОНТ-ийн захирал Н.Байгал, МҮОНР-ийн захирал Т.Бямбатогтох нартай уулзаж “Хүнсний хангамж, аюулгүй байдлыг хангах талаар авах арга хэмжээний тухай” 36-р тогтоолыг хэрэгжүүлэх арга хэмжээний төлөвлөгөөг танилцууллаа.
“Хүнсний хангамж, аюулгүй байдлын талаар авах зарим арга хэмжээний тухай” 5 хэсэг, 49 заалт бүхий тогтоолд иргэд, олон нийтэд чиглэсэн “Хоол, хүнсний зохистой, соёлтой хэрэглээний талаарх сургалт, сурталчилгаа, соён гэгээрүүлэх ажлын зохион байгуулах” гэсэн заалт орсон.
Тогтоолыг хэрэгжүүлэх арга хэмжээний төлөвлөгөөнд Нийгмийн хариуцлагын хүрээнд бүх телевиз, радиогийн хөтөлбөрт “Хүнсний аюулгүй байдлын цаг” нэвтрүүлгийг 7 хоног тутам тогтсон цагт явуулж ард иргэдийг хоол хүнсний зөв зохистой хэрэглээнд төлөвшүүлэх ажилд оролцуулах ажлыг зохион байгуулахаар заасан. Уг ажлыг Эрүүл мэндийн яам, Боловсрол, шинжлэх ухааны яам, Эдийн засаг, хөгжлийн яам, Хүнс, хөдөө аж ахуй, хөнгөн үйлдвэрийн яам, Харилцаа холбооны зохицуулах хороо, Монголын үндэсний олон нийтийн радио, телевиз болон мэргэжлийн холбоод хамтран хэрэгжүүлнэ гэж тусгасан.
Уг ажлыг Эрүүл мэндийн яам, Боловсрол, шинжлэх ухааны яам, Эдийн засаг, хөгжлийн яам, Хүнс, хөдөө аж ахуй, хөнгөн үйлдвэрийн яам, Харилцаа холбооны зохицуулах хороо, Монголын үндэсний олон нийтийн радио, телевиз болон мэргэжлийн холбоод хамтран хэрэгжүүлнэ гэж тусгасан.
УИХ-ын 36-р тогтоолын хүрээнд иргэдийг соён гэгээрүүлэхэд чиглэсэн дээрх ажлыг “Олон нийтийн радио, телевизийн тухай” хуульд заасан чиг үүргийн дагуу хийж хэрэгжүүлэхэд бэлэн байгаагаа МҮОНРТ-ийн Ерөнхий захирал А.Бүрэнбаатар илэрхийллээ.
Мөн телевиз, радиогоор 7 хоног тутам цацагдах “Хүнсний аюулгүй байдлын цаг” нэвтрүүлгийн агуулга, хэлбэрийн талаар МҮОНТ-ийн захирал Н.Байгал өөрийн саналаа хуваалцсан юм. Тэрээр “Хоол, хүнс гэдэг бол иргэдэд хамгийн ойр сэдэв. Тийм ч учраас хоол, хүнсний зохистой хэрэглээний талаар олон нийтийг соён гэгээрүүлэх нэвтрүүлэг нь сонирхол татахуйц, иргэдийн дуу хоолойг шингээсэн иргэн төвтэй, гэр бүлийн реалити хэлбэрээр болон танин мэдэхүйн чиглэлийн хоол, хүнсний зохистой хэрэглээ, аюулгүй байдлын талаар туршилт хийдэг амралтын нэвтрүүлгийн өнгө төрхтэй байж болно” гэдгийг онцоллоо.
Энэхүү хоол, хүнсний зохистой хэрэглээг сурталчлах телевиз, радиогийн нэвтрүүлгийг МҮОНРТ-ээс гадна нийгмийн хариуцлагын хүрээнд бусад телевиз, радио хийж хэрэгжүүлэх зохицуулалтын бодлогыг Харилцаа холбооны зохицуулах хорооноос зохицуулалтын бодлогоор хангаж ажиллах юм.
