Тулгар төрийн 2230, 2231, Их Монгол Улс байгуулагдсаны 815, 816, Үндэсний эрх чөлөө, тусгаар тогтнолоо сэргээн мандуулсны 110, 111, Ардын хувьсгалын 100, 101 жилийн ойг тохиолдуулан Монгол Улсын Ерөнхийлөгч Ухнаагийн Хүрэлсүх зарлиг гарган улс орны хүнсний хангамж, хүнсний аюулгүй байдалд үнэтэй хувь нэмэр оруулж, хүнс үйлдвэрлэлийн салбарт олон жил зүтгэсэн Баялаг бүтээгчдэд төрийн дээд цол, одон медаль гардууллаа.
Монголын ард түмнийг хүнсээр хангах ариун ажилд 20 гаруй жил хүчин зүтгэсэн хичээл зүтгэлийг нь үнэлэн “Жүр Үр” компанийн ерөнхий технологич Ганболдын Сарангэрэлийг төрийн дээд “Алтан гадас” одонгоор шагналаа.
Тэрбээр “Төрдөө зүтгэлээ үнэлүүлж энэ сайхан шагналыг хүртэж буйдаа баяртай байна. Миний бие “Жүр Үр” компанийн ерөнхий технологич ажил албыг 23 дахь жилдээ хашиж байна. Өөрийн аав ээж нартаа, ажлын хамт олондоо, хамгийн чухал хэрэглэгч нартаа маш их баярлалаа гэж хэлмээр байна. Эрүүл зөв хоол хүнс гэдэг бол хүмүүс бидний хувьд эрүүл байх хамгийн чухал бөгөөд хамгийн эхний алхам, хэрэгцээ шаардлага гэж би боддог. Энэ салбарынхаа цаашдын хөгжилд өөрийн хувь нэмрээ оруулж хичээж ажиллах болноо” хэмээгээд хүн ардаа эрүүл, чанартай хүнсээр хангах эрхэм үүргээ нэр төртэй биелүүлж ирсэн, одоо ч ажилласаар байгаа хүнсний салбарын үе үеийн баялаг бүтээгчдэд Үндэсний их баяр наадмын мэнд дэвшүүллээ.