2023 оны 7 дугаар сарын 10-наас 14-ний өдрүүдэд Нэгдсэн Үндэстний Байгууллагын Аж үйлдвэрийн хөгжлийн байгууллагаас (UNIDO) “Аж үйлдвэрийн паркийн удирдлагын сургалт”-ыг Ази номхон далайн санхүүгийн институттэй хамтран БНХАУ-ын Шанхай хотноо зохион байгууллаа.
Тус сургалтанд Ази, номхон далайн бүсийн UNIDO-гийн гишүүн хөгжиж буй 8 улсын (Бангладеш, Индонез, Лаос, Соломоны арал, Кампучи, Монгол, Филиппин, Тайланд) Аж үйлдвэрийн парк, тус салбарыг хариуцсан яамны төлөөллүүд оролцсны дотор Монгол улсаас ХХААХҮЯ, Монголын арьс ширний үйлдвэрлэлийн холбоо, “Эмээлт эко”, “Шинэ ховд” аж үйлдвэрийн парк, “Дархан арьс ширний цогцолбор төсөл” зэрэг байгууллагыг төлөөлсөн албаны 5 хүн хамрагдлаа. Сургалтын хүрээнд нийт 48 цагийн танхимын хичээлээс гадна “Сужоу үйлдвэрлэл, хот төлөвлөлтийн парк”, “Технологийн үйлдвэрлэлийн парк”, “Шанхай хотын төлөвлөлт, чөлөөт эдийн засгийн бүс” чиглэлээр танилцах аялал, сургалт явагдсан байна. Энэ үеэр байгаль орчин, үйлдвэрлэлийн бохирдлын мониторингийн чиглэлээр хэт ягаан туяаны тусламжтайгаар орчны бохирдлын химийн бодисуудын хэмжээг тодорхойлох бүтээгдэхүүн гаргасан ECMUS компанийн бүтээгдэхүүнтэй нарийвчлан танилцуулжээ.
Аж үйлдвэрийн паркийн хөгжлийн цикл, Хятадын аж үйлдвэрийн паркийн хөгжлийн үзэл баримтлал, бүтээн байгуулалт, хандлага, Хятад улсын чөлөөт эдийн засгийн бүс, аж үйлдвэрийн паркийн хөгжлийн туршлага, Аж үйлдвэрийн парк, чөлөөт бүсийн төсөлд үзүүлдэг UNIDO-гийн дэмжлэгийн тухай, Эко аж үйлдвэрийн паркийн зарчим, хэрэгжүүлсэн жишээ, Аж үйлдвэрийн паркийн байгаль орчны бохирдлын мониторинг, дэвшилтэт технологи, Чөлөөт эдийн засгийн бүсийн оновчтой төлөвлөлт зэрэг сэдвүүдээр дэлхийд тэргүүлэгч мэргэжилтнүүд лекц уншиж, суралцагсад шалгалтанд хамрагдан UNIDO-гоос батламж (Сертификат) олгов.
Сургалтын үеэр Монголын төлөөлөгчид НҮБ-ын Аж үйлдвэрийн хөгжлийн байгууллагын Агробизнес, дэд бүтцийн хөгжил хариуцсан захирал Дежене Тезера, мөн Ази, номхон далайн бүсийн хэлтсийн дарга Зао Жи нартай уулзаж, Монгол улсад хэрэгжүүлж буй Аж үйлдвэрийн паркийн төслүүдэд хамтран ажиллах, дэмжлэг хүсэх талаар ярилцсан байна.
