Үр тарианы үйлдвэрлэлээрээ дэлхийд тэргүүлэгч Украины үр тарианы экспорт цаашид үргэлжлэх боломжгүй болсны улмаас олон улсын зах зээл дэх улаан буудайн үнэ гурван хувиар өсжээ.
Тодруулбал орон нутгийн цагаар 17-ны өдөр ОХУ Хар тэнгисийн үр тарианы хэлэлцээрээс гарч буйгаа зарласны дараа ийнхүү үр тарианы үнэ өсөж эхэлсэн байна. Ройтерс агентлагийн мэдээлснээр, Чикагогийн худалдааны бирж дээр улаан буудайн фьючерсийн үнэ 3.0 хувиар өсөж, бушель нь 6.81 ам.доллар, эрдэнэ шишийн үнэ 1.4 хувиар өсөж, 5.21 ам.доллар, шар буурцгийн үнэ 1.1 хувиар өсөж 13.86 ам.долларт хүрсэн болохыг онцлов.
Өнгөрсөн оны хоёрдугаар сард ОХУ Украинд түрэмгийлэхтэй зэрэгцэн тус улсын үр тарианы экспорт зогсосноор олон улсын үр тарианы үнэ хамгийн дээд хэмжээндээ хүрч өсөж байв. Гэвч мөн оныхоо долдугаар сард олон улсын зуучлалын хүрээнд Хар тэнгисийн үр тарианы хэлэлцээрийг байгуулж, Хар тэнгисийн боомтуудаар дамжуулан тээвэрлэх боломжтой болж байдал тогтворжсон билээ. Тус гэрээг тус тус 120 хоног, 60 хоногоор нийт гурван удаа сунгасан ч энэ удаад ОХУ-ын эсэргүүцэлтэй тулгарснаар ийнхүү үргэлжлэх боломжгүйд хүрээд буй юм. Учир нь Украин улсын хувьд үр тарианы экспортдоо далайн тээврийг ашиглахад хүндрэлтэй болж байгаа тул хуурай замаар Зүүн Европоор дамжуулан гуравдагч улс руу экспортлохоос аргагүй нөхцөл байдал үүсээд байгаа юм. Үүний улмаас экспортын хэмжээ огцом буурах нь гарцаагүй.
Украиныг “дэлхийн талхны сагс” хэмээн олон улсад нэрийддэг ба улаан буудай, эрдэнэ шишийг их хэмжээгээр экспортолж ирсэн билээ. Зах зээлд үр тарианы үнийн өсөлтийг дагаад талх, гоймон зэрэг боловсруулсан хүнсний бүтээгдэхүүний үнэ ч ээлж дараалан өсөж, олон улсын инфляцид сөргөөр нөлөөлөх вий хэмээн шинжээчид эмээж байна.
Хэдийгээр ОХУ болон Бразил улсууд улаан буудай, эрдэнэ шишийн экспортоо нэмэгдүүлж байгаа ч эдийн засгийн хувьд сул дорой орнуудад хүнсний хямрал нүүрлэж болзошгүй гэж Ассошиэйтед Пресс агентлаг анхааруулав.
Үнэн хэрэгтээ НҮБ-ын Хүнс, хөдөө аж ахуйн байгууллага нь Украинаас үр тариа худалдан авч Сомали, Йемен, Афганистан зэрэг мөргөлдөөнд нэрвэгдсэн орнуудыг хоол хүнсээр хангахад анхааран ажиллаж байсан юм. Олон улсын аврах хорооны Зүүн Африкийн тэргүүн Шашварт Сараф үр тарианы гэрээг цуцалснаар ган гачигт нэрвэгдсэн Африк тивийн зүүн хойд хэсэгт орших Сомали, Этиоп, Кени зэрэг улсуудад хүнсний бүтээгдэхүүний үнэ өсөх вий хэмээн эмээж байгаагаа онцлон тэмдэглэв.
