Тэрээр “Хойд Америк, Ази, Африк, Европын өргөн уудам хэсэгт харгис зун болж байна. Бүх гарагийн хувьд энэ бол гамшиг юм. Үүнд хүмүүс бид өөрсдийгөө л буруутгах хэрэгтэй. Үүний талаар бид аль эртнээс мэдэж байсан. Энэ өөрчлөлтийн талаар цорын ганц гайхах зүйл нь хэтэрхий хурдан өөрчлөгдөж байгаа нь л юм. Дэлхийн уур амьсгалын өөрчлөлт аль хэдийн хаяанд ирсэн гэдгийг ойлгоорой. Хүчтэй бороонд хүүхдүүд урсаж, айлууд галаас зугтааж, ажлаа хийж буй иргэд халуунаас болж ухаан алдаж байна. Энэ агаараар амьсгалах боломжгүй, энэ халууныг тэсвэрлэх чадал үгүй. Хамгийн аймшигтай нь энэ бол дөнгөж эхлэл. Дэлхийн дулаарал дуусаж, дэлхийн буцлалт эхэлж байна” хэмээн ноцтой мэдэгдэл хийжээ. Түүнчлэн хорт утаа ялгаруулж буй гэгдээд байгаа G20-ийн орнуудыг эрчимтэй ажиллаж, арга хэмжээ авахыг уриалжээ.
Үүний талаар Английн Лийдсийн их сургуулийн уур амьсгалын физикийн профессор, Их Британийн Уур амьсгалын өөрчлөлтийн хорооны дарга Пирс Форстер “Антонио Гуттериш хүмүүсийн анхаарлыг татахын тулд хурц үг, хэллэг ашигласан ч энэ нь зөв алхам байлаа гэж бодож байна. Учир нь засгийн газрууд одоо уур амьсгалын өөрчлөлтийг нухацтай хүлээн авах цаг болсон” хэмээв.
Хэт халуун нэрвэгдэж байгаа улсуудаас дурдвал “гамшигт хамгийн их өртөмтгий бүс” болох Ази тивд цаг агаарын эрс тэс нөлөөлөл нэмэгдэж, дэлхийн дунджаас хурдан дулаарч байгаа гэнэ. Хятадын Шинжаанд 52.2 хэм, Италийн Ром хотод 41.8 хэм хүрч дээд цэгтээ хүртэл халжээ. АНУ-ын Аризона мужийн Финикс хотод 26 хоног дараалан 43.3 хэм хүрсэн байна. Мөн хэт халалтаас болж Грект ой хээрийн түймэр дэгдэж АНУ, Мексик, Итали зэрэг улсуудад олон хүмүүс халуунаас болж амь насаа алдахад хүрчээ.
Өнгөрөгч долоодугаар сард дэлхийн түүхэндээ хамгийн халуун гурван долоо хоног, хамгийн халуун гурван өдөр, далайн халалт хамгийн өндөр цэгтээ хүрсэн зэрэг тохиолдлууд бүртгэгдэв. Энэхүү уур амьсгалын өөрчлөлт, хэт өндөр эрс тэс температурын халалтаас болж гал түймрийн аюулууд ихээр нэмэгдэж байгаа ба Дэлхийн цаг уурын байгууллагын (WMO) мэдээлснээр дараагийн таван жилийн ядаж нэг нь түүхэн дэх хамгийн халуун жил болох магадлал 98 хувьтай байгаа гэнэ.