Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Хөвсгөл аймгийн Хүнс, хөдөө аж ахуйн газрын дарга Я.Эрхэмбаярыг хүлээн авч уулзлаа.
Хөвсгөл аймгийн Засаг даргын Тамгын газар, Хүнс, хөдөө Аж Ахуйн газар “Органик мах Хөвсгөл экспо-2023” Намрын ногоон өдрүүд арга хэмжээг 2023 оны 09 дүгээр сарын 11-ээс 09 дүгээр сарын 12-ны өдөр зохион байгуулах гэж байна.
Монгол Улсын Ерөнхийлөгч У.Хүрэлсүхийн санаачлан хэрэгжүүлж буй “Хүнсний хангамж, аюулгүйй байдал” үндэсний хөдөлгөөнийг эрчимжүүлэх хүрээнд баялаг бүтээгчдийн үйл ажиллагааг дэмжих, органик мал аж ахуй эрхлэгчид, мах, махан бүтээгдэхүүн үйлдвэрлэгчид,экспортлогчид, үндэсний үйлдвэрлэлийг дэмжих, хүнсний хангамжийг нэмэгдүүлэх, чанар аюулгүй байдлыг хангах, ногоон эдийн засгийн өрсөлдөх чадварыг нэмэгдүүлэх, шинэ зах зээл, шинэ боломжийг нээх, олон улсын хамтын ажиллагааг хөгжүүлэх стратегийн зорилтыг ханган цаашдын бодлого шийдвэртээ нарийвчлан тусгах зорилготой юм.
Тус арга хэмжээнд 150 гаруй баялаг бүтээгч, үйлдвэрлэгч, хүнс, хөдөө аж ахуйн салбарын албан хаагчид оролцох төлөвтэй байна.
Хөвсгөл аймаг Хөвсгөл аймагт 20 мянга гаруй малчин өрхөд 33900 иргэн мал маллаж байна. Тус аймаг мал сүргийн тоогоор улсад тэргүүлж байгаа мал аж ахуйн эдийн засагт суурилсан аймаг юм. Иймд мал аж ахуйн үйлдвэрлэлийг эрчимжүүлж гаднын зах зээлд түүхий эдийг нийлүүлж ашиг орлого олохын тулд Органик мал аж ахуйтай аймаг болох уриалгыг дэвшүүлэн ажиллаж байна.
