Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр үндэсний үйлдвэрлэгч “Баялаг тахиа” компанийн төлөөллүүдийг хүлээн авч уулзлаа.
Монгол Улсын Ерөнхийлөгч У.Хүрэлсүх 5 жилийн хугацаанд гол нэр төрлийн 19 хүнсний бүтээгдэхүүнээр дотоодын хэрэгцээгээ бүрэн хангаж, цаашлаад бүс нутагтаа экспортлогч орон болох зорилготой “Хүнсний хангамж, аюулгүй байдал” үндэсний хөдөлгөөнийг санаачлан эхлүүлсэн. Дээрх 19 нэр төрлийн хүнсний бүтээгдэхүүний нэг нь тахианы мах бөгөөд өнөөдрийн байдлаар манай улс дөнгөж дотоодын хэрэгцээнийхээ 10 орчим хувийг л өөрсдөө хангадаг.
2023 оны 4 дүгээр сараас эхлэн тахианы махны чиглэлээр үйл ажиллагаа явуулж эхэлсэн үндэсний үйлдвэрлэгч “Баялаг тахиа” компани нийт 350 хүнийг ажлын байртай болгож, дотоодын тахиан махны хэрэгцээний 50 хүртэлх хувийг хангах зорилт дэвшүүлэн ажиллаж байна. Ингэснээр бусад үндэсний үйлдвэрлэгчдийн хамт дотоодын хэрэгцээгээ бүрэн хангадаг болох боломжтой гэж үзэж байна.
Мөн тус хамт олон тэжээлээ өөрсдөө үйлдвэрлэдэг нь маш том давуу тал болжээ. Өөрөөр хэлбэл эх орондоо тарьж, ургуулсан үр тариа, буудайгаар тэжээлээ бэлтгэдэг нь эцсийн бүтээгдэхүүн болох тахианы махны чанарт эерэг нөлөө үзүүлж, мөн зардлыг бууруулж үнийн хувьд хямд бөгөөд эрүүл, шинэхэн тахиан махаар хэрэглэгчдэдээ үйлчлэх нөхцөл бүрдүүлж байна.
“Баялаг тахиа” компани Хэдий үйл ажиллагаа явуулж эхлээд удаагүй ч ISO 22001, ISO 9001, НАССР зэрэг стандартын шаардлагыг ханган ажиллаж байгаагаас гадна дэлхийн шилдэг тоног төхөөрөмж бүхий үйлдвэрлэлийг Монгол Улсад нэвтрүүлж эхэлжээ.
АНУ-ын Рос-308 үүлдрийн тахиаг 21 хоног инкубаторт дарж, дэгдээхийгээ өөрсдийн үйлдвэрлэсэн тэжээлээр хооллон, 45 хоногийн дараа хэрэглэгчдэд шинэхэн, эрүүл зөөлөн эцсийн бүтээгдэхүүн болгон хүргэдэг байна.
Төхөөрөх үйлдвэрийн хувьд өдөрт 20,000 шувуу, жилд 1,5-4,5 сая шувуу төхөөрөх, ангилах, савлах хүчин чадалтай. Мөн тус үйлдвэр сэрвээх, хөргөх, гүүн хөлдөөх чадалтай бөгөөд 150 тн бүтээгдэхүүн хадгалах багтаамжтай юм.
