Трактор, комбайны чимээ тал дүүрэн нүргэлсэн энэ өдрүүдэд бид эгэл тариаланчийн амьдралаас эгнэшгүй их түүхийг соёолж ургуулсан Монгол Улсын Хөдөлмөрийн баатар, Гавьяат механикжуулагч Нацагийн Дэлгэрмөрөн баатрын нэгэн намрыг сурвалжлахаар “Нарийн Шүрэн” ХХК-ий тариан талбайг зорьсон юм.
“Нарийн Шүрэн” ХХК-ий Зөвлөх инженер, МУ-ын Гавьяат механикжуулагч Нацагийн Дэлгэрмөрөн өнөө жил Үндэсний их баяр наадмыг тохиолдуулан Монгол Улсын Ерөнхийлөгчийн зарлигаар “МОНГОЛ УЛСЫН ХӨДӨЛМӨРИЙН БААТАР” хэмээх эрхэм цол хүртсэн.
Хөдөлмөрийн баатар Н.Дэлгэрмөрөн нь 1976-1977 онд Шаамарын ТМС-ийг тракторч комбайнчийн мэргэжлээр дүүргэж, ангийн хэсэг нөхдийн хамт Найрамдал САА-г зорьж, Согоочийн бригадад тариаланч Катубай багшийн удирдлага дор ажиллахаар хуваарилагдаж байсан цаг хугацаа саяхан мэт боловч даруй 46 дахь намрынхаа ургацыг хурааж аваад байна.
Цагааннуур сум нь улсын ургацын 20 орчим хувь, аймгийнхаа үр тарианы 40 гаруй хувийг дангаараа үйлдвэрлэдэг. Өнөөдрийн байдлаар эднийд тариа хураалт 50 гаруй хувьтай явж байна.
Цагааннуур сумын “Нарийн Шүрэн” ХХК
2023.10.13
