Монгол Улсын Ерөнхийлөгч Ухнаагийн Хүрэлсүхийн Вьетнам, Лаос Улсад хийсэн төрийн айлчлал 2023 оны 11 сарын 01-07-нд болж өндөрлөлөө. Тэрбээр энэ сарын 01-ний өдрөөс айлчлалаа эхлүүлсэн юм. Айлчлалын хүрээнд хоёр улстай харилцаа, хамтын ажиллагааг өргөжүүлэн хөгжүүлэх болон олон улс, бүс нутгийн хамтын ажиллагааны өргөн хүрээний асуудлаар санал солилцов.
Манай улсын хувьд олон тулгуурт гадаад бодлогын чухал багана бол Зүүн Өмнөд Азитай харилцах харилцаа юм. Тэр дундаа Вьетнам, Лаос улстай харилцах харилцаа маш чухал.
Айлчлалын хүрээнд хоёр улстай хүнс, хөдөө аж ахуй, худалдаа, эдийн засгийн хамтын ажиллагааг өргөжүүлэх, аялал жуулчлалын салбарыг бодлогоор дэмжих, иргэд хоорондын солилцоог нэмэгдүүлэх таатай нөхцөлийг бүрдүүлж чадав.
Мөн айлчлалын хүрээнд Ханой, Вьентьян хотуудад “Бизнес форум” болон экспортын чиг баримжаатай бараа бүтээгдэхүүний үзэсгэлэн худалдааг хамтран зохион байгуулж, хоёр оронтой харилцах монголын бизнес эрхлэгчдийн хамтын ажиллагаанд бодлогын дэмжлэг үзүүлсэн нь худалдаа, хөрөнгө оруулалт, эдийн засгийн харилцан ашигтай хамтын ажиллагааг өргөжүүлэн хөгжүүлэх боломжийг бүрдүүлэв.
“Бизнес форум”-д Монголын талаас Монгол Улсын Ерөнхийлөгч У.Хүрэлсүх, Ерөнхийлөгчийн Тамгын газрын дарга Я.Содбаатар, Үндэсний аюулгүй байдлын зөвлөлийн нарийн бичгийн дарга Ж.Энхбаяр, Гадаад харилцааны сайд Б.Батцэцэг, ХХААХҮ-ийн сайд Х.Болорчулуун, Ерөнхийлөгчийн Гадаад бодлогын зөвлөх Э.Одбаяр, Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр тэргүүтэй албаны хүмүүс болон хүнс хөдөө аж ахуй, хөнгөн үйлдвэрлэл, аялал жуулчлал, уул уурхай, барилга, тээвэр зуучлал, уламжлалт анагаах ухааны бүтээгдэхүүн үйлдвэрлэл зэрэг салбар, чиглэлийн компанийн ААН-ийн 70 гаруй төлөөлөл оролцлоо.
Мөн МҮХАҮТ-ын Ерөнхийлөгч Д.Энхтүвшин, МҮХАҮТ-ын дэд дарга Ц.Магнайбаатар нар “Монгол Улсын бизнесийн орчин” сэдвээр, Монгол Улсын ХХААХҮЯ-ны газрын дарга Э.Анар “Хүнс хөдөө аж ахуйн салбарын хөрөнгө оруулалтын боломжууд сэдвээр, Хүнсний хувьсгал ТББ-ын Удирдах зөвлөлийн гишүүн Т.Мөнхтөр, Г.Энхбилэг нар илтгэл тавьж хоёр улстай хийх хамтын ажиллагааны боломжуудыг танилцууллаа.
Ханой, Вьентьян хотуудад зохион байгуулагдсан бизнес форумын үеэр хоёр улсын бизнес эрхлэгчдийн дунд В2В уулзалт, Монгол Улсын экспортын бараа бүтээгдэхүүний танилцуулах үзэсгэлэн худалдаа боллоо. Монголын 30 орчим үндэсний үйлдвэрлэгчдийн 500 гаруй бүтээгдэхүүнийг БНСВУ, БНАЛАУ-ын албаны хүмүүс болон бизнес эрхлэгчид үзэж, үйлдвэрлэгчдэд хамтран ажиллах, бүтээгдэхүүн худалдан авах саналууд ирлээ.
Төрийн тэргүүний айлчлалын хүрээнд Монгол Улсын Ерөнхийлөгчийн Тамгын газар, Гадаад харилцааны яам, Монголын Үндэсний Худалдаа Аж Үйлдвэрийн Танхим, “Хүнсний хувьсгал” ТББ хамтран “Бизнес тур” аялал зохион байгууллаа. Уг аялалаар монголын бизнес эрхлэгчид Вьетнам, Лаос улсын эрчим хүч, хүнс, хөдөө аж ахуй, тээвэр ложистикийг салбарын аж ахуй нэгж, үйлдвэрүүдтэй танилцав.
Гаднын томоохон үйлдвэр, үйлчилгээний салбаруудтай бизнес эрхлэгчдийг танилцуулах, туршлага судлах, хамтран ажиллах боломжийг нь нээж өгөх зорилготой энэхүү аялалыг Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, МҮХАҮТ-ын ерөнхийлөгч Д.Энхтүвшин, МҮХАҮТ-ын дэд дарга Ц.Магнайбаатар нар ахлан ажиллалаа.
Бизнес эрхлэгчдийн зүгээс “Монголын бизнес эрхлэгчдэд бодлогын дэмжлэг үзүүлсэн төрийн тэргүүний энэхүү айлчлалууд нь бизнесээ өргөжүүлэн хөгжүүлэх, сайн түншийг олох, бусад улстай хүнс, хөдөө аж ахуй, худалдаа, эдийн засгийн хамтын ажиллагааг өргөжүүлэх томоохон хөшүүрэг болж олон шинэ төслийг амжилттай хэрэгжүүлэх урам зориг болж байна” хэмээн баярласнаа илэрхийллээ.
Вьетнам, Лаос улсаас хийсэн Төрийн айлчлал болон бизнес форум, бизнес турын сурвалжлага нэвтрүүлэг тун удахгүй хүрнэ.
