МУ-ын Ерөнхийлөгчийн Үйлдвэр, үйлчилгээний бодлого хариуцсан зөвлөх бөгөөд Хүнсний төсөл, хөтөлбөр хариуцсан албаны дарга Ч.Даваабаяр: Аливаа улс үндэстний аюулгүй байдлын үндэс нь найдвартай баталгаатай хүнсэн дээр тогтдог. Манай улс жилд нэг тэрбум ам.долларын хүнсний бүтээгдэхүүнийг импортоор авч байна. Үүнийг багасгаж нэн тэргүүнд дотоодын үйлдвэрлэлээ дэмжиж, эрүүл ахуйн шаардлага хангасан чанартай бүтээгдэхүүн үйлдвэрлэж, ард түмнээ эрүүл хүнсээр хангах шаардлагатай. Энэ шаардлагыг Монгол Улсын Ерөнхийлөгч манлайлан ХҮНСНИЙ ХУВЬСГАЛ-ыг санаачлан эхлүүлсэнд иргэд талархаж байна.

Түүнчлэн МХЕГ, татварынхан хянадаг, шалгадаг, торгодог байдлаа үндсээр нь халж зөвлөн тусладаг болсонд үйлдвэрлэгчид ам сайтай байна. Ерөнхийлөгчийн санаачлагыг УИХ дэмжин хууль эрх зүйн орчныг бүрдүүлж, төсөл хөтөлбөр хэрэгжүүлэхэд шаарлагатай 1,7 их наяд төгрөгийн төсвийг баталж өгсөн нь иргэдээ бодсон ТҮҮХЭН ШИЙДВЭР байлаа.

УИХ-ын 36-р тогтоолыг бид ажил хэрэг болгон ирэх таван жилд 19 нэр төрлийн хүнсний бүтээгдэхүүнээ дотоодоосоо 100 хувь хангахад төр засаг, баялаг бүтээгчид, үндэсний үйлдвэрлэгчид болон ард түмний идэвх, оролцоо маш чухал байгааг онцлон хэлье. Цаашид ижил төстэй импортын бүтээгдэхүүний татварыг үе шаттайгаар нэмэгдүүлж дотоодын зах зээлээ хамгаалах зорилт тавин ажиллах болно. Мөн үйлдвэрлэлийн зориулалттай тоног төхөөрөмжийг гааль, НӨАТ-аас чөлөөлөх, эх оронч худалдан авалтыг дэмжих шаардлагатай. Төр томоохон худалдан авагч болох суурь ч тавигдаж байна. Мөн бага хүүтэй, урт хугацаатай зээл олгох нь зүйтэй. Эдгээрийг ард иргэд, баялаг бүтээгчид олон жилийн турш хүсэж, ярьж байгаа. Харин одоо биелэлээ олоход тун ойрхон ирлээ. Монгол Улсад газар тариалан, мал аж ахуй, үндэсний үйлдвэрлэл хөгжих суурь тавигдлаа. Дундардаг бус үрждэг баялаг бий болгохын төлөө төр, баялаг бүтээгчид хамтдаа хичээх л үлдлээ.

Баялаг бүтээж эх орондоо сайхан амьдарцгаая.