Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд манай улс гол нэр төрлийн 19 хүнсний бүтээгдэхүүнийг дотоодоосоо бүрэн хангах зорилт тавьсан.

Энэ хүрээнд Монгол улсын ерөнхийлөгч Ухнаагийн Хүрэлсүх дээрх нэр төрлийн хүнсний үйлдвэрүүдэд ажиллаж байгаа бөгөөд энэ удаад “НВЦ” компанийн “Баян өндөгний үйлдвэр”-т ажиллалаа.

Үндэсний үйлдвэрлэгч “НВЦ” компани 1998 онд үүсгэн байгуулагдсан бөгөөд дотоодын өндөгний хэрэгцээний 50 хувийг дангаараа ханган, 500 гаруй ажлын байр бий болгон ажиллаж байна.

2023 онд улсын хэмжээнд 500 орчим сая өндөг зах зээлд борлуулагдсаны 300 сая буюу 60 орчим хувийг дотоодын аж ахуйн нэгжүүд нийлүүлсэн байна. Үүний 50 хувийг “НВЦ” ХХК дангаар бүрдүүлжээ. Тэд анх ердөө 100.000 толгой шувуу өндөглөгчтэйгөөр үйлдвэрлэлээ эхлүүлж байсан бол одоогоор 1 сая толгой шувуу өндөглөгчтэй болтлоо өргөжсөн байна.

Сүүлийн жилүүдэд дэлхийн улс орнуудад өндөгний хэрэглээ эрс нэмэгдэж байгаа судалгаа бий. Монгол орны хувьд ч гэсэн 2000 оны байдлаар улсын нийт өндөгний жилийн хэрэглээ нэг сая өндөг байсан бол 2022 оны судалгаагаар 430 сая болон өссөн байдаг. Тэгвэл өндөгний томоохон үйлдвэрлэгч “НВЦ” компанийн хувьд чанарыг хянах боломжгүй импортын бүтээгдэхүүнийг халж амин дэмээр баян бүтээгдэхүүн үйлдвэрлэж байна.

“НВЦ” ХХК-ийн “Баян” өндөгний үйлдвэр нь жилд 200 сая өндөг нийлүүлдэг бөгөөд дэгдээхэй бойжуулах, өндөг ангилан савлах, хагас боловсруулсан бүтээгдэхүүний болон тэжээлийн үйлдвэр зэргийг цогцоор нь байгуулжээ.

Тус компанийн гүйцэтгэх захирал Ц.Баатарбилэг хэлэхдээ: -“Манай хамт олон энэ жил шувууныхаа тоо толгойг 1.5 саяд хүргэж, өндөг үйлдвэрлэгч бусад аж ахуйн нэгжтэй хамтран, 2025 он гэхэд өндөгний дотоодын хэрэгцээг бүрэн хангах зорилготой” гэсэн юм.

Ийнхүү төрийн тэргүүн манлайлал үзүүлж үйлдвэрлэгчдийн санал хүсэлтийг сонсон тулгамдаж буй асуудлыг шийдвэрлэж байгаа нь дотоодын үйлдвэрлэгч нарт томоохон дэмжлэг болж байна.