“Хүнсний хувьсгал” үндэсний хөдөлгөөний хүрээнд гаргасан бодлого шийдвэрүүд, хийж хэрэгжүүлсэн ажлууд үр дүнгээ өгч Монгол Улсын хүнс болоод хөнгөн үйлдвэрлэлийн салбарт ихээхэн ахиц гарсаар байгаа юм. Энэ хүрээнд Монгол Улсын Ерөнхийлөгч Ухнаагийн Хүрэлсүх 2003 оноос хойш үйл ажиллагаагаа явуулж байгаа “Хүнс Сервис” хэрчсэн гурилын үйлдвэрт ажиллалаа.
“Хүнс Сервис” компани нь жигнэж хэрчсэн 14 төрлийн бэлэн гурилаа сургууль, цэцэрлэг, нийтийн хоолны газрууд болон сүлжээ дэлгүүрүүдэд нийлүүлдэг байна. Мөн “Алтан тариа”, “Улаанбаатар гурил”, “Өег” зэрэг компаниудаас түүхий эдээ авч, зориулалтын агуулахдаа нөөцлөн, иргэдэд хямд, чанартай, баталгаатай, хүнсний нэмэлт бүтээгдэхүүнгүй, хадгалалтын хугацаа уртасгагч бодисгүй гурил үйлдвэрлэж байна.
Тэрээр тус компанийн захирал Ш.Саранчимэг ижил төстэй үйл ажиллагаа явуулдаг 100 гаруй аж ахуйн нэгжийг хөрөнгө оруулалтын зээлд хамруулж өгвөл таван жилийн дотор дотоодын зах зээлээ бүрэн хангаж, улмаар бүтээгдэхүүнээ экспортод гаргах боломжтой гэж үздэгээ илэрхийллээ.
Мөн “Хүнс сервис” компани нь нийтдээ 50 гаруй хүнийг ажлын байраар хангаж байгаа бөгөөд мэргэжлийн болон мэргэшсэн ажилтнууд үйлдвэрийн шат дамжлагад ажиллаж, чанартай бүтээгдэхүүнүүдийг хэрэглэгчдийн гарт хүргэдэг байна.
“Хүнс Сервис” компани бүтээгдэхүүнээ баяжуулж, нэр төрөл бүрээ өөрийн гэсэн онцлогтой үйлдвэрлэдэг. Тодруулбал, энгийн хэрчсэн гурил нь улаан буудайгаар хийгддэг бөгөөд дархлалын системийг сайжруулж, хавдрын болон үрэвслийн эсрэг үйлчилгээ үзүүлдэг. Луувантай хэрчсэн гурил нь ходоод, олгойн хий тараах, цэр арилгах, толгойн өвчин намдаах зэргээс сэргийлж, олон төрлийн амин дэмийг агуулдаг. Мөн монгол шпагетти гурил, хөх тариат гурил, гоньдтой гурил, бүхэл үрийн болон дэлгэмэл зэрэг олон төрлийн сонголттойгоор жигнэж, хэрчсэн гурилыг үйлдвэрлэж байна.
