Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр өнөөдөр үндэсний үйлдвэрлэгч “Тод Оймс” ХХК-ийн үйл ажиллагаатай танилцаж, санал солилцлоо.
“Тод Оймс”-ны үйлдвэр нь төрөл бүрийн оймс, сүлжмэл бүтээгдэхүүн үйлдвэрлэн нийслэл, орон нутгийн 14 салбар дэлгүүрээр дамжуулан дотоодынхоо оймсны зах зээлд нийлүүлэхээс гадна 16 улс руу экспортолж байна.
Бүтээгдэхүүний хувьд сарлаг, тэмээний хөөвөр, ноос, ноолуур, хөвөн даавуугаар бүх насныханд зориулсан орчин үеийн, өнгө будгийн өвөрмөц загвартай оймснуудыг үйлдвэрлэж байна. Жилдээ 600тн хонины ноос, 30 тн сарлагийн хөөвөр, 50 тн тэмээний ноос, 8 тн ямааны ноосон бүтээгдэхүүн үйлдвэрлэх хүчин чадалтай.
Цар тахлын жилүүдэд тухайн үеийн Засгийн газар аж ахуйн нэгжүүдийн дулаан, цахилгааны төлбөрийг төрөөс даах шийдвэр гаргасан нь үйл ажиллагаагаа тасралтгүй явуулах, ажлын байраа хадгалж үлдэхэд томоохон дэмжлэг болсныг “Тод Оймс” ХХК-ийн үүсгэн байгуулагч Б.Баяржаргал хэллээ.
Мөн Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр одоогоос 4 жилийн өмнө “Баялаг бүтээгчдийг дэмжинэ” төслийн хүрээнд тус үйлдвэрийн үйл ажиллагаатай танилцаж байв. Тухайн үеэс ажилчдын тоо, экспортын хэмжээ, бүтээгдэхүүний гарц зэрэг үйлдвэрийн бүхий л хүчин чадал 2 дахин нэмэгдсэн хэмээн Ерөнхий менежер Ууганбаяр хэллээ.
Цаашид үйл ажиллагаагаа өргөжүүлж экспортод гарах ноолууран бүтээгдэхүүний үйлдвэрлэлээ эхлүүлнэ гэв.
