Монгол Улсын Засгийн газраас 2024 оныг “Бүсчилсэн хөгжлийг дэмжих жил” болгон зарласантай холбогдуулан “Монгол Улсын эдийн засгийн чуулган-Бүсчилсэн хөгжлийн зөвлөгөөн” 2024 оны 02 дугаар сарын 01-02-ны өдрүүдэд Улаанбаатар хотноо болж байна.
Зөвлөгөөнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр оролцож байна.
Мөн Улсын Их Хурал, Засгийн газрын гишүүд, аймаг нийслэлийн засаг дарга нар, аймгийн ИТХ-ын төлөөлөгчид, сумын Засаг дарга нар, төр, хувийн хэвшлийн төлөөллүүд оролцож байна.
Хөдөө, орон нутагт хүн ам амьдрахад таатай хот, суурин газрын бий болгох, хөдөө аж ахуйн бизнес хөгжих орчныг дэмжих мөн хүнсний гол нэрийн бүтээгдэхүүний дотоодын хэрэгцээг бүрэн хангах боломжийг бүрдүүлэхэд бүс нутгийн хөгжил чухал бөгөөд энэхүү зөвлөгөөнөөр бүс нутгууд өөрийн нөөц боломж, давуу талдаа тулгуурлан эдийн засгийн тэргүүлэх чиглэлээ оновчтой тодорхойлж хөгжлийн зургаа гаргах юм.
Монгол Улсын Ерөнхий сайд Л. Оюун-Эрдэнэ:
“Монгол Улс өнгөрсөн онд эдийн засаг 6,8 хувиар өсч, Дотоодын нийт бүтээгдэхүүн 63,3 их наядад хүрч, нэг хүнд ногдох Дотоодын нийт бүтээгдэхүүн анх удаа 5.220 ам.долларт, валютын албан нөөц 4,5 тэрбум ам.долларт хүрсэн нь эдийн засгийн өсөлтөө тогтвортой хадгалах, үр өгөөжтэй байлгах шаардлагатай бөгөөд цаашид эдийн засгаа төрөлжүүлэхэд анхаарах шаардлагатай” гэв.
Ерөнхийлөгчийн үйлдвэр, үйлчилгээний бодлогын зөвлөх Ч.Даваабаяр:
“Монгол Улсын төсөв 330 хуваагддаг байсан бол одоо бүсчлэлээрээ долоо л хуваагдана. Бүсчилсэн хөгжлийн энэ бодлогыг хэрэгжүүлснээр Монгол улсын хөгжлийг шинэ төвшинд гаргаж бүсүүд хоршин, кластераар хөгжиж цаашлаад эдийн засаг солонгорч гадаад , дотоод зах зээл тэлэх боломжтой. Бид маш чухал ажлын суурийг тавилаа. Одоо төр хурдтай ажиллаж үр дүнд хүрэх нь чухал” гэлээ.
