Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр өнөөдөр Нийслэлийн Сүхбаатар дүүрэгт үйл ажиллагаа явуулж буй залуу старт-ап “Изи күүк” хөлдөөсөн хоолны бэлдцийн үйлдвэрт ажиллалаа.
“ИЗИ КҮҮК” ХХК нь 2020 онд байгуулагдсан. Хоол үйлдвэрлэлийн салбарт ухаалаг шийдлийг үндэслэн богино хугацаанд эрүүл ахуйн стандартад нийцсэн, мэргэжлийн тогоочийн амт чанартай хоолыг гэртээ хийж идэх боломжийг олгож байна.
Үйлдвэрлэлийн хувьд хүнсний шим тэжээл, чанарыг алдагдуулалгүйгээр хөлдөөх технологи ашиглан шинэ, эрүүл хүнсийг хэрэглэгчийн гарт хүргэж өгдөг бөгөөд орчин үеийн нийгэмд зайлшгүй байх шаардлагатай, шийдлийг олж чадсан бизнес хэмээн төслийг санаачлагч. Н.Одонхүү хэллээ.
Тус үйлдвэр 30 гаруй ажилтантай, бүтээгдэхүүнээ олон улсын жишигт нийцсэн онлайн такси үйлчилгээний UBcab компанитай хамтран хүргэдэг байна.
Цаашид салбартаа тэргүүлэгч, мастер тогооч нартай хамтран Мэргэжлийн тогоочийн жороор бэлтгэсэн хоолыг худалдаанд нэвтрүүлэхээр төлөвлөн ажиллаж байна.
