Монгол Улсын Ерөнхийлөгч Ухнаагийн Хүрэлсүх хөнгөн үйлдвэрийн салбарт орчин үеийн дэвшилтэт техник, технологи бүхий томоохон үйлдвэр байгуулах талаар судалж, танилцуулахыг салбар яамдын сайд нарт чиглэл болгосон. Тодруулбал, тэрээр малын гаралтай бүх төрлийн түүхий эдийг дотооддоо бэлтгэх, нийлүүлэх, боловсруулах, эцсийн бүтээгдэхүүн үйлдвэрлэх, борлуулах асуудлыг цогцоор нь шийдэх ёстой гэсэн юм.
Энэ хүрээнд Монгол Улсын Ерөнхийлөгчийн Үндэсний аюулгүй байдлын бодлогын зөвлөх Ж.Энхбаяр, Үйлдвэр, үйлчилгээний бодлогын зөвлөх Ч.Даваабаяр, Хөдөө аж ахуй, хөнгөн үйлдвэрийн бодлогын зөвлөх З.Мэндсайхан нар салбар яамдын удирдлагууд, мэргэжлийн холбоод, үйлдвэрлэгчдийн төлөөллийг хүлээн авч уулзав.
Уулзалтаар салбарын өнөөгийн нөхцөл байдал, үйлдвэрлэгчдийн санал хүсэлтийн сонслоо. ХХААХҮЯ-ны Хөнгөн үйлдвэрийн бодлогын хэрэгжилтийг зохицуулах газар, ЭЗХЯ-ны Бүс нутаг, аж үйлдвэрийн бодлогын газраас мэдээлэл өгөв.
