Батлан хамгаалахын сайд Г.Сайханбаяр, Ерөнхийлөгчийн Эдийн засгийн бодлогын зөвлөх Б.Даваадалай нар бусад албаны хүмүүсийн хамт Баянхонгор аймагт ажиллаж байна. Ажлын багийнхан өвөлжилт хүндэрсэн гурван аймгийн 10 гаруй суманд ажиллахаар төлөвлөжээ.
Баянхонгор аймгийн 11 сум зудын эрсдэл маш их, есөн сум зудын эрсдэл их байна. Тус аймаг 12.951 малчин өрхтэй, дөрвөн сая гаруй толгой малтай. Өнөөдрийн байдлаар 17 мянга гаруй толгой мал хорогдоод байгаа аж.
Аймгийн хэмжээнд 30 мянган боодол өвсийг 18 сумын аюулгүйн нөөц, 102 малчин өрхөд хямдралтай борлуулж, 4000 төгрөгийн хөнгөлөлтийг аймгийн Онцгой комиссоос шийдвэрлэжээ. Цаашид техникийн хүрэлцээгүй байдал үүсэх, өвс, тэжээлийн хомсдол бий болох, малчид санхүүгийн боломжгүйн улмаас хэрэгцээтэй зүйлсээ худалдан авч чадахгүй байх, малын эрүүл мэндийн асуудал хүндрэх нөхцөл байдлууд үүсэж байна гэж Баянхонгор аймгийн Засаг дарга Д.Мөнхсайхан онцоллоо.
Нийт нутгаар хаваржилт хүндэрч, гамшгийн улбар шар түвшинд шилжсэнтэй холбогдуулан Засгийн газрын шийдвэрээр салбарын сайд нараар ахлуулсан малчдад туслах шуурхай бүлгүүд байгуулсан. Бүлгүүдийг салбарын сайд нар ахлан ажиллаж байгаа бөгөөд Батлан хамгаалахын сайд Г.Сайханбаяраар ахлуулсан шуурхай бүлэг Баянхонгор, Өвөрхангай, Архангай аймагт ажиллаж байгаа юм.
Эх сурвалж: https://montsame.mn/
