Улсын хэмжээнд 2023 оны эцэст тоологдсон 30 сая эх малын 120.1 мянга нь 2024 оны эхний сард хорогдоод байна
Улсын хэмжээнд нэгдүгээр сард 453.9 мянган толгой мал зүй бусаар хорогдож, малын хорогдол өмнөх оны мөн үеэс 60 орчим хувиар буюу 169.1 мянган толгойгоор өссөнийг Үндэсний статистикийн хороо мэдээллээ.
Харин хоёрдугаар сарын 18-ны өдрийн байдлаар улсын хэмжээнд 667 мянга 841 толгой мал хорогдоод байгааг ОБЕГ мэдээлэв. Тухайлбал: энэ сарын 15-наас эхлэн дийлэнх нутгаар цас орж, цасан болон шороон шуурга шуурч, зарим үед гамшгийн хэмжээнд хүрч, байгалийн онц аюултай үзэгдэл болсны улмаас сүүлийн хоёр хоногт 160 гаруй мянган толгой мал хорогджээ.
Оны эхний нийт малын тоотой харьцуулахад улсын дундаж нэг хувь, Сүхбаатар аймаг 5.3 хувь, Хэнтий 2.8 хувь, Дорноговь аймаг 3.6 хувь буюу хэвийн хорогдлын хэмжээнээс давжээ. Оны эхний сард Сүхбаатар аймагт 151.3 мянга, Хэнтий аймагт 66.8 мянга, Дорноговь аймагт 60.2 мянга, Архангай аймагт 32.8 мянга, Дорнод аймагт 20.5 мянга, Хөвсгөл аймагт 19 мянган толгой мал хорогдсон нь нийт хорогдлын 77.3 хувийг эзэлж байна.
Малын зүй бус хорогдлыг төрлөөр нь авч үзвэл 197.6 мянган толгой хонь, 182.8 мянган толгой ямаа, 47.9 мянган толгой үхэр, 25.4 мянган толгой адуу, 123 толгой тэмээ тус тус хорогдоод байгаа аж. Нийт хорогдсон малын 40.3 хувийг ямаа, 43.5 хувийг хонь эзэлж байна.
Монгол орны нийт нутгийн 80 гаруй хувьд цасан бүрхүүлтэй, зарим газартаа 100 см хүртэл зузаан цастай. Увс, Өвөрхангай, Сүхбаатар, Дундговь, Дорноговь аймгийн 21 суманд төмөр буюу мөсөн зудын нөхцөл үүсээд байна.
Мал аж ахуйн салбарын өвөлжилт, хаваржилтын нөхцөл байдал хүндэрч байгаатай холбоотойгоор улсын хэмжээнд гамшгаас хамгаалах өндөржүүлсэн бэлэн байдлын зэрэгт шилжүүлээд байгаа юм. Өвөлжилт нэн хүнд байгаа аймаг, сумдад улс, аймгийн нөөцөөс 20 мянга орчим тонн өвс, тэжээлийг үнэгүй олгохоор шийдвэрлээд байна.
Зудын эрсдэлийг бууруулах, малчдад эрүүл мэнд, нийгмийн халамжийн үйлчилгээг тасралтгүй хүргэх, эрэн хайх аврах ажиллагааг шуурхай зохион байгуулахад шаардлагатай автомашин, шатахуун болон бусад бараа материалын зардал, аймгуудад улсын нөөцөөс өвс, тэжээл хямдруулан олгох, хаагдсан зам, давааг нээх, айл өрхийг нүүлгэн шилжүүлэх, түргэн тусламжийн автомашин нь эвдэрсэн, засварлах боломжгүй, ашиглаж буй автомашиныг шинээр олгох зэрэгт шаардагдах хөрөнгийг Засгийн газрын нөөц сангаас гаргахаар болоод байна.
Эх сурвалж: bloombergtv.mn