Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр өнөөдөр “Монголын ноосон бүтээгдэхүүн үйлдвэрлэгчдийн холбоо”-ны төлөөлөлтэй уулзаж ноос, ноолууран бүтээгдэхүүний хэрэглээг нэмэгдүүлэх зорилго бүхий “Монгол ноос XI зуун” төслийн талаар мэдээлэл сонслоо.
“Могол ноос” ХХК-ийн захирал Эрдэнэбат, ноос боловсруулах салбарт инновацыг нэвтрүүлэх, эх оронч худалдан авалтаар үндэсний үйлдвэрлэлээ дэмжих, ноосыг эдийн засгийн эргэлтэд бүрэн оруулах, цаашид ноос бэлтгэх, нийлүүлэх, боловсруулах, эцсийн бүтээгдэхүүн үйлдвэрлэх, борлуулах асуудлыг цогцоор нь шийдэж, импортыг орлох, цаашлаад экспортод гаргах бүтээгдэхүүн үйлдвэрлэх орчин үеийн дэвшилтэт технологи бүхий томоохон үйлдвэр байгуулж, ноос боловсруулах салбарыг хөгжүүлэх нь уг төслийн зорилго гэдгийг онцлов.
“Монголын ноосон бүтээгдэхүүн үйлдвэрлэгчдийн холбоо”-ны тэргүүн Б.Ганбат “Монгол Улсын Ерөнхийлөгч Ухнаагийн Хүрэлсүх хөнгөн аж үйлдвэрийн салбарт онцгойлон анхаарч, хонины ноосыг 100 хувь эдийн засгийн эргэлтэд оруулах нөхцөл бүрдүүлэхийг чиглэл болгосон нь уг салбарт үйл ажиллагаа явуулж буй үндэсний үйлдвэрлэгчдэд томоохон урам зоригийн хөшүүрэг болсон. Төрийн тэргүүний шийдвэр гарсан даруйд уг салбарийн эрдэмтэн судлаачид, үйлдвэрлэгчид, холбооны гишүүдээс бүртсэн 40 орчим хүн нэгдэж салбарын асуудлыг цогцоор нь хөгжүүлэх уг төслөө боловсруулсан” гэдгээ уулзалтын үеэр хэллээ.
2011 онд УИХ-ыг 30-р тогтоол батлагдаж байв. Тогтоолын хэрэгжилтийн үр дүнд ээрэх үйлдвэрүүд техник технологийн шинэчлэлт хийж сүлжмэлийн зориулалттай нарийн ширхэгт утас үйлдвэрлэх хүчин чадалтай тоног төхөөрөмжүүдийг шинээр суурилуулж, манай орны ээрмэлийн үйлдвэрлэл дэлхийн зах зээлийн өнөөгийн шаардлагын түвшинд хүрсэн. Мөн 16 аймагт эсгий, эсгий эдлэлийн жижиг үйлдвэр шинээр ашиглалтад орсон нь орон нутагт ажлын байрыг нэмэгдүүлж ажилгүйдлийг бууруулах, өртөг багатай, чанартай бүтээгдэхүүнээр орон нутгийн хэрэглэгчдийг хангахад хувь нэмрээ оруулсан. юм. Мөн ноос, хялгас, хялгас зэрэг түүхий эдийг ашиглан төрөл бүрийн ноосон дулаалга үйлдвэрлэх хүчин чадалтай үйлдвэрүүд бий болж байна. Иймд уг салбарт оруулж буй санхүү, хөрөнгө оруулалтын болон хууль эрх зүйн дэмжлэгийн үр өгөөж нь эдийн засагт өндөр ач холбогдолтой тул төрийн тэргүүн хөнгөн аж үйлдвэрийн салбар луу чиглэсэн томоохон хөдөлгөөн эхлүүлээсэй хэмээн хүсч буйгаа салбарын төлөөллүүд илэрхийллээ.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр хөнгөн аж үйлдвэрийн салбарт үйл ажиллагаа явуулж буй “Нэхээсгүй Эдлэл” хувьцаат компанийн үйлдвэрлэлийн үйл ажиллагаатай танилцлаа.
“Нэхээсгүй эдлэл” ХК нь 1989 онд Монгол Польшийн засгийн газрын хэлэлцээрээр Нэхээсгүй эдлэлийн үйлдвэр нэртэйгээр анх байгуулагдсан ба 1992 онд хувьцаат компани болгон зохион байгуулагдаж, 1997 онд бүрэн хувьчлагджээ. 1998-2000 онд ноос угаах үйлдвэрээ шинээр барьж ашиглалтанд оруулсан ба бүтээгдэхүүнээ үйлдвэрлэхэд шаардагдах ноосыг угааж 100% чанарын шаардлага хангасан түүхий эдээр дотоодын үйлдвэрүүдээ хангаж байна.
Тус компани нь жилд 1500 тн ноос угааж төрөл бүрийн ноос, ноосон бүтээгдэхүүн үйдвэрлэх хүчин чадалтай. Бүтээгдэхүүнээ хамгийн сүүлийн үеийн Австри, Германы шивэх технологиор бат бөх, ус нэвтэрдэггүй, удаан эдэлгээтэй үе давхрагаараа хуурдаггүй зэрэг давуу чанартайгаар үйлдвэрлэн дотоод гадаадын зах зээлд нийлүүлдэг байна.
