Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр Монголын ууган машинт хивсний үйлдвэр “Улаанбаатар хивс” ХК-ийн үйлдвэрт ажиллалаа.
“Улаанбаатар хивс” ХК нь ашиглалтанд орсноос хойш өнөөг хүртэл 53 дахь жил үйл ажиллагаагаа тасралтгүй явуулж байгаа үндэсний томоохон үйлдвэрлэгч юм.
Тус үйлдвэр нь монгол хонины ноосыг ээрэх, будах, нэхэх, нөхөн засах, гүйцэтгэн боловсруулах гэсэн хивс үйлдвэрлэлийн иж бүрэн дамжлагуудаар боловсруулан, эцсийн бэлэн бүтээгдэхүүн болох 100 % ноосон, нарийн нэхээстэй, орчин үеийн болон сонгодог хээ зураг, төрөл бүрийн өнгө бүхий экологийн цэвэр бүтээгдэхүүн үйлдвэрлэн дотоодын болон гаднын зах зээлд нийлүүлж байна.
Жилдээ нэг ээлжээр 175000 м2 машинт хивс нэхэх цех, 160 тонн нарийн ээрмэл, 120 тонн бүдүүн ээрмэл үйлдвэрлэх ээрэх цех, 100000 тонн утас будах будгийн цех гэсэн үндсэн үйлдвэрлэлтэй ба жилд нэг ээлжээр 1000 м2 гар хивс үйлдвэрлэх хүчин чадалтай гар хивсний цех болон эсгийн цехүүдтэй юм.
Улаанбаатар, Алтанбулаг, Саян, Алтан-Өргөө зэрэг нэр төрлийн хивснүүдийг үйлдвэрлэн нэрийн дэлгүүрүүдээрээ худалдаалж байна. Мөн үндсэн үйлдвэрлэлээс гадна туслах үйлдвэрлэл эрхэлж, 100 хувь хонины ноосоор хийсэн захиалгат хивс, эсгий гудас, углааш, тааран цүнх, машины суудал, ноосон бүтээлэг зэрэг бүтээгдэхүүнүүд үйлдвэрлэж байна.
