“Хүнсний хангамж, аюулгүй байдлыг хангах талаар авах зарим арга хэмжээний тухай” УИХ-ын 36 дугаар тогтоолыг хэрэгжүүлэгч байгууллагуудын 3 дахь удаагийн зөвлөлдөх уулзалт 2024 оны 03 дугаар сарын 05-ны өдөр Төрийн ордонд зохион байгуулагдлаа.
Монгол Улсын Ерөнхийлөгчийн Тамгын газрын даргын 2023 оны 07 дугаар сарын 06-ны өдрийн 108 дугаар захирамжаар 36-р тогтоолын хэрэгжилтийг эрчимжүүлэхээр хоёр ажлын хэсэг байгуулсан бөгөөд тогтоолын хэрэгжилтийн тайланг нэгтгэн 3 дахь удаагийн зөвлөлдөх уулзалтаар хэлэлцүүлэхийг ажлын хэсгүүдэд үүрэг болгосон.
Энэ хүрээнд “Хүнсний хангамж, аюулгүй байдлыг хангах талаар авах зарим арга хэмжээний тухай” 36 дугаар тогтоолыг хэрэгжүүлэгч байгууллагуудын өнгөрсөн хугацаанд хэрэгжүүлсэн ажлын үр дүн, ололт амжилт, алдаа оноо, саад бэрхшээлийг хэлэлцэн, цаашид төр хувийн хэвшлийн хамтын ажиллагааг хүнс, хөдө аж ахуй, мал аж ахуй, боловсрол, газар тариалан, шинжлэх ухааны салбарт үр дүнтэй хэрэгжүүлэх талаар санал солилцлоо.
Хэлэлцүүлгийг Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр удирдан явууллаа. Ерөнхийлөгчийн Эдийн засгийн бодлогын зөвлөх Б.Даваадалай “Хүнсний хувьсгал” үндэсний хөдөлгөөний хэрэгжилтийн талаар болон ЕТГ-ын даргын 108 дугаар захирамжаар батлагдсан ажлын хэсгийн үр дүнг танилцуулж “Хүнсний хувьсгал”-ын хүрээнд олгож буй зээл санхүүжилт нь эко технологи руу чиглэсэн байх, бодлогын дэмжлэг жигд бус байгаа тул мал аж ахуй, хөнгөн үйлдвэрлэлийн салбар луу анхаарах, нэн ялангуяа малын эрүүл мэндийн аюулгүй байдлыг онцгойлон авч үзэх, төрийн байгууллагуудын тоо баримт статистик мэдээ бодитой байх шаардлагатай байгааг анхааруулав.
Улсын Их Хурлын Тамгын газрын Хяналт шалгалт, үнэлгээний газраас тогтоолыг хэрэгжүүлэгч яамд нэг хуулийг нөгөө хуульд нь шингээх замаар орхигдуулж, арга хэмжээ авахгүйгээс 36-р тогтоолын хэрэгжилтийг үр дүнгүй болгож байна. Төсөв дээрээ суучихсан, хийх ажлын төлөвлөгөө нь тодорхой ажлууд хэрэгжүүлэгч яамд дээр удаашралтай байна гэж үзэж байгаагаа илэрхийлэв.
Хэлэлцүүлгийг хааж Ерөнхийлөгчийн Тамгын газрын дарга Я.Содбаатар үг хэлэв. Тэрээр “Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөнийг бодитой, иргэдэд өгөөжтэй байлгах зорилгоор Ерөнхийлөгчийн тамгын газраас салбарын эрдэмтэд, мэргэжлийн холбоодтой хамтран хүнс, хөдөө аж ахуйн салбарын “Эрдэмтдийн зөвлөл”, мөн мэргэжлийн холбоодоос бүрдсэн “Хүнсний хувьсгал” төрийн бус байгууллага байгуулан иргэд, олон нийтэд чиглэсэн үйл ажиллагааг эрчимтэй хийж байна. Тогтоолыг хэрэгжүүлэгч төрийн байгууллагуудын ажил удаашралтай байгаа учраас Ерөнхийлөгчийн Тамгын газар анхаарал хандуулж байна. ХХААХҮЯ болон холбогдох яамд, шат шатны байгууллагууд тогтоолын хэрэгжилтэд онцгой анхаарч Ерөнхийлөгчийн тамгын газрыг бодит мэдээ мэдээллээр хангаж ажиллах шаардлагатай байна” гэв.
Ерөнхийлөгчийн Тамгын газраас тогтоолын хууль, эрх зүй, удирдлага зохион байгуулалтын ажлыг сайжруулж, эрчимжүүлэх, мал аж ахуй, хүнсний бүх шатны лабораторийн санхүүжилтэд онцгой анхаарч ажиллах шаардлагатай байгааг анхууруулав.
Хэлэлцүүлэгт Улсын Их хурлын Тамгын газар, УИХ-ын Байнгын хороод, Засгийн газрын хэрэг эрхлэх газар, холбогдох яамд, төрийн байгууллага, хүнс, хөдөө аж ахуйн салбарын эрдэмтэд, мэргэжлийн холбоод бүхий 59 байгууллагын 120 гаруй албаны хүмүүс оролцлоо.
Ерөнхийлөгчийн тамгын газрын зүгээс өнөөг хүртэлх хугацаанд төрийн 59 байгууллагатай хамтарч ажиллахын зэрэгцээ 2000 гаруй баялаг бүтээгч нартай уулзаж, 4 удаагийн томоохон хурал зөвлөгөөн, төр хувийн хэвшлийн хамтын ажиллагааг бэхжүүлэх, оновчтой шийдвэр гаргах зорилгоор 65 үйлдвэр аж ахуйн нэгжтэй танилцаж, баялаг бүтээгч, төрийн байгууллагуудын хоорондын хамтын ажиллагааг бэхжүүлэх зорилгоор 400 гаруй оролцогч бүхий танилцах 7 удаагийн тур аялал, төрийн 11 байгууллагатай хамтран 8 удаагийн сургалт хэлэлцүүлэг, Олон улсын бизнес турыг 3 удаа зохион байгуулан тухай бүр хэвлэл, мэдээллийн хэрэгслээр дамжуулан, тусгай зорилтот 67 нэвтрүүлгийг бэлтгэн хүргээд байна.
