УИХ-ын чуулганы нэгдсэн хуралдаанаар Монгол Улсын Ерөнхий сайд Л.Оюун-Эрдэнийн Засгийн газрын бүтцийн тухай болон Засгийн газрын бүрэлдэхүүний тухай хуулийн төслийн анхны хэлэлцүүлгийг хийлээ. Шинээр эмхлэн байгуулагдах Засгийн газар нь Ерөнхий сайд, 22 сайд, 16 яамтай ажиллана.
Ингээд Хүнс, хөдөө аж ахуй, хөнгөн үйлдвэрийн сайдаар Ж.Энхбаяр томилогдож, тангарагаа өргөлөө. Ж.Энхбаяр нь 1973 онд Улаанбаатар хотод төрсөн. 1990 онд Нийслэлийн 10 жилийн 1 дүгээр дунд сургууль, 1991 онд Цэргийн нэгдсэн дээд сургууль, 1999 онд Монгол Улсын их сургуулийг Эрх зүйч мэргэжлээр төгсөж, 2005 онд Нидерландын Хаант Улсын Маастрихтын их сургуульд Бизнесийн удирдлагын магистрын зэрэг хамгаалсан. Англи, орос хэлтэй.
- 1992-2000 онд “Нэхий” ХХК, “Сүлжмэл” ХХК-ийн Төлөөлөн удирдах зөвлөлийн дарга, “Газар” ХХК-ийн захирал,
- 2000-2002 онд Нефть, онцгой албан татварын гаалийн газрын дарга,
- 2002-2004 онд Улаанбаатар хотын гаалийн газрын Хяналт шалгалтын хэлтсийн дарга, дэд дарга,
- 2004-2006 онд Гаалийн ерөнхий газарт зөвлөх,
- 2006-2008 онд Улсын Мэргэжлийн хяналтын газрын дэд дарга, Тамгын газрын дарга,
- 2008-2012 онд Монгол Улсын Их Хурлын гишүүн,
- 2012 онд Монгол Улсын Засгийн газрын гишүүн, Батлан хамгаалахын сайд,
- 2012-2016 онд Монгол Улсын Их Хурлын гишүүн,
- 2014-2016 онд Монгол Улсын Их Хурлын Аюулгүй байдал, гадаад бодлогын байнгын хорооны дарга,
- 2016-2017 онд Монгол Улсын Их Хурлын Аюулгүй байдал, гадаад бодлогын байнгын хорооны дарга,
- 2016-2020 онд Монгол Улсын Их Хурлын гишүүн,
- 2020-2021 онд Монгол Улсын Ерөнхий сайдын Ажлын албаны дарга, ахлах зөвлөх
- 2021-2023 ҮАБЗ-ийн нарийн бичгийн дарга
- 2023-2024 Монгол Улсын Ерөнхийлөгчийн Аюулгүй байдал, улс төрийн зөвлөхөөр тус тус ажиллаж байсан
- 2024 онд УИХ-ын гишүүнээр сонгогдсон
Түүний хувьд Монголын тариаланчдын үндэсний холбооны Ерөнхийлөгч бөгөөд мал аж ахуй, хөдөө аж ахуйн салбарын мэдлэг, боловсролтой. Мөн Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөнийг дэмжин ажиллаж, газар тариалангийн салбарт тулгамдаж буй асуудлаар байр сууриа илэрхийлж ирсэн юм.
/2024.07.10/ УИХ-ЫН ЧУУЛГАН
УИХ-ын гишүүн Ж.Энхбаяр: Газар тариалангийн бүс нутаг буюу тэжээлийн бааз дээр суурилсан хүн амын өсөн нэмэгдэж байгаа хүнсний хэрэгцээг хангахын тулд зарим бүс нутагт эрчимсэн МАА-г хэрэгжүүлэхээс өөр арга байхгүй. Ингэж байж байнгын, тасралтгүй хүнсний хангамжийг зохих түвшинд нь барина. Нүүдлийн мал аж ахуйгаа бид байгаль цаг уурын эрсдэлээс онцгой хамгаалж, даван туулах чадавхийг бий болгох зайлшгүй шаардлага тулгарч байгаа. Үүнд бодлогын томоохон арга хэмжээ авч хэрэгжүүлэх ёстой . Мөн бэлчээрийн талхлалтын асуудал нэлээд хөндөгдөж байна. Монгол орны нийт бэлчээрийн газрын 76 хувь нь доройтолд орчихсон гэсэн судалгаа бий. Ийм нөхцөлд нүүдлийн соёл иргэншлийг бид авч үлдэх нь нэг талаасаа түүх соёл, ёс уламжлалаа авч үлдэж буй хэлбэр. Нөгөө талаас 200 гаруй мянган малчин өрхийнхөө амьдралын тогтвортой байдлыг хангах чиглэлд анхаарч ажиллах хэрэгтэй гэсэн бодолтой байна.