Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Мэргэжлийн сүмо бөхийн 70 дахь их аварга Харүмафүжи Д.Бямбадоржийн үүсгэн байгуулсан “Харүмафүжи сүүний ферм”-д ажиллалаа.
Харүмафүжи аварга Төв аймгийн Баянхангай суманд хөрсний доройтолд орсон 200 га газрыг нөхөн сэргээж, үхрийн тэжээл болох эрдэнэ шиш, судан өвс тариалах ажлаас фермерийн аж ахуйгаа эхлүүлжээ. Тэрээр хүүхдийн сүү, сүүн бүтээгдэхүүний хэрэглээг дотоодоос бүрэн хангадаг, жишиг болохуйц цогц ферм хөгжүүлэхийг зорьж буй юм. Тус ферм нь нэг үнээнээс өдөрт 35-40 литр сүү саах боломжтой Францын сүүний чиглэлийн 100 гаруй Монбиллиард үүлдрийн үхэртэй бөгөөд үхрийн баасыг хуримтлуулж, бордоо болгон ашигладаг буюу уг ферм нь огт хог хаягдалгүй, эко эрчимжсэн мал аж ахуй аж.
Дэлхийн стандарт хангасан эрүүл ахуйн өндөр шаардлага бүхий бүрэн автомат саалтуураар вакум орчинд, агаартай урвалд оруулахгүй байдлаар боловсруулдаг “Пастерийн арга” гэж нэрлэгддэг бага хэмээр халааж ариутгадаг технологиор уг сүүг үйлдвэрлэдэг бөгөөд энэ нь түүхий сүүний өөрийнх нь амт, чанар, шимт байдлыг хадгалдагаараа онцлогтой аж.
Монгол Улсын хэмжээнд сүү, сүүн бүтээгдэхүүний 206 үйлдвэр, цех 77 хөргөлтийн төв үйл ажиллагаа явуулж, тэдгээрт нийт 1680 гаруй хүн ажиллаж байна. Үүнээс сүү боловсруулах 10 үйлдвэр олон улсын чанарын болон хүнсний аюулгүй байдлын тогтолцоо нэвтрүүлсэн /ISO 9000, ISO 22000, HACCAP, тетрапак/ байна. Сүүний боловсруулах салбарын суурилагдсан хүчин чадал жилд 400.0 мянган тн бөгөөд өнөөдрийн байдлаар 51 хувийг ашиглаж байгаа бөгөөд үлдсэн хувийг импортоор хангаж байна. Монгол Улс дотоодынхоо сүүний зах зээлийг бүрэн хангахын тулд өндөр ашиг шимт фермерийн үнээний аж ахуйг хөгжүүлэх шаардлагатай. Ингэснээр сүүний гарц, нийлүүлэлтийг нэмэгдүүлэх боломжтой гэдгийг энэ салбарынхан онцолж байна.
Монгол Улс ирэх 5 жилд 19 нэр төрлийн хүнсний бүтээгдэхүүнийг дотоодоосоо хангах зорилт тавьсан. Үүнд сүү, сүүн бүтээгдэхүүн багтаж байгаа бөгөөд энэ салбарыг хөгжүүлэхэд Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөн чухал үүрэг гүйцэтгэж байна. Тодруулбал 3-5 жилийн хугацаатай, 5-6 хувийн хүүтэй хөнгөлөлттэй зээл, Гаалийн татварын хөнгөлөлт, чөлөөлөлт, НӨАТ-аас чөлөөлөх, Сүүний урамшуулал зэргээр бодлогын дэмжлэг үзүүлсээр байна.
