“Хүнсний хангамж, аюулгүй байдал” үндэсний хөдөлгөөний хүрээнд тэмдэглэн өнгөрүүлж буй “Атрын 65” жилийн ойн хүрээнд “Алтан намар 2024” ургацын баяр Дархан-Уул аймагт үргэлжилж байна. Энэ жилийн ургацын баярын онцлог нь Монгол Улсын Их Хурал, Засгийн газрын шийдвэрээр Хүнс, хөдөө аж ахуй, хөнгөн үйлдвэрийн яам, харьяа хэлтэс, агентлагуудын хамт Дархан-Уул аймагт нүүж ирэн үйл ажиллагаагаа эхлүүлж байгаагаараа онцлог юм.
“Алтан намар 2024” ургацын баярт Монгол Улсын Ерөнхийлөгч У.Хүрэлсүх, Хүнс, хөдөө аж ахуй, хөнгөн үйлдвэрийн сайд Ж.Энхбаяр тэргүүтэй албаны хүмүүс, гадаад улсаас Монгол Улсад суугаа Элчин сайд нар, ХАА-н салбарын төсөл, хөтөлбөр хэрэгжүүлэгч олон улсын байгууллагууд, газар тариалан эрхлэгч, баялаг бүтээгчид оролцож байна.
Ургацын баярын арга хэмжээнд оролцогчид хүнс, хөдөө аж ахуй, хөнгөн үйлдвэрийн салбарын баялаг бүтээгч, тариаланч, аж ахуйн нэгжүүдийн төлөөлөл, иргэдтэй уулзаж, ХАА-н салбарын техникийн парадыг үзэж сонирхлоо.
