Монгол Улсын Ерөнхийлөгч Ухнаагийн Хүрэлсүх Туркменистан Улсын Ерөнхийлөгч Сердар Бердымухамедов-ын урилгаар тус улсад төрийн айлчлал хийсэн.
Айлчлалын хүрээнд “Монгол-Туркменистан” хоёр улсын үндэсний үйлдвэрлэгч, бизнесийн төлөөллийг оролцуулсан бизнес форум зохион байгуулав. Бизнес форумд хоёр улсын үндэсний үйлдвэрлэгчид хэрхэн хамтарч ажиллах боломж байгаа талаар хэлэлцэж, харилцан мэдээлэл солилцлоо.
“Монгол, Туркменистаны бизнес форум”-ын үеэр Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр “Хүнсний хувьсгал” үндэсний хөдөлгөөний талаар болон Туркменистан, Монгол хоёр орны тээвэр, ложистикийн салбарын чадавхи, экспорт-импорт, хоёр улсын хооронд худалдаа, эдийн засгийн хамтын ажиллагааг өргөжүүлэх боломжуудын талаар танилцууллаа.
Бизнес форумаар Туркменистан, Монголын бизнес эрхлэгчдийн хамтын ажиллагааны боломжуудыг энэ үеэр хэлэлцэв. Монголын талаас 40 гаруй, Туркменистаны талаас 40 гаруй аж ахуйн нэгж оролцсон уг форум нь хоёр орны бизнес эрхлэгчдийн хамтын ажиллагааг өргөжүүлэх, шинэ боломжуудыг нээхэд чиглэсэн чухал арга хэмжээ болсон гэдгийг талууд онцоллоо.
