Дорнод аймгийн хэмжээнд 25 иргэн, ААН зөгийн аж ахуй эрхэлдэг. Энэ намар л гэхэд 1409 бүл зөгийнөөс 36.6 тонн зөгийн бал хураан авчээ. Тэдний нэг төлөөлөл бол Баяндун сумын зөгийчин Б.Энхбаяр.
Б.Энхбаярын гэр бүл, хамаатан саднууд өөрсдөө эко хүнс хэрэглэх зорилгоор Халх гол сумаас 30 бүл зөгий худалдан авч үйл ажиллагаагаа эхлүүлжээ. Харин 30 бүл зөгийнөөсөө 200 гаруй литр зөгийн бал хураан авсан учир цаашид аж ахуйгаа өргөжүүлэхээр шийдэн шил сав захиалж, зөгийн балаа сумандаа борлуулж байгаа юм. Ийнхүү нутгийн брэнд бүтээгдэхүүндээ нагац аавынхаа алдрыг хайрлаж “Аюур” хэмээн нэрлэжээ.
“Аюур” брэндийн зөгийн аж ахуй Баяндун сумын Дунд үлийн давааны ард байрлаж байна. Нэг литрийн савлагаатайг нь 60 мянган төгрөг, 500 граммын савлагаатайг нь 30 мянган төгрөгөөр худалдаж байна. Ирэх онд тохиох сумынхаа 100 жилийн ойд зориулж, жижиг савлагаатай зөгийн бал гаргахаар ажиллаж байгаа юм.
Сонирхуулахад, 1-2 хоногтой ажилчин зөгий хамт төрсөн “дүү” өндөгнүүдээ дулаан байлгах, 3-5 хоногтой нь том авгалдайнуудыг, 6-11 хоногтой нь жижиг авгалдайнуудыг хооллох үүрэг хүлээдэг. Харин 12-17 хоногтой нь давирхай гарган сархинаг барьж хүнс зөөнө. 18-21 хоногтой зөгий үүрээ гадны халдлагаас хамгаалдаг бол түүнээс дээш настай зөгийнүүд 40-45 нас хүрч үхэх хүртлээ үүрнээсээ гарч цэцгийн тоос тоосонцор, бал, ус цуглуулан тоос хүртээх зэрэг ажил хийдэг.
Эх сурвалж: Монцамэ агентлаг
