Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд “И Монгол Академи” УТҮГ-тай хамтран ажиллаж байна. Хамтын ажиллагааны хүрээнд төрийн үйлчилгээний “E-Mongolia” системд “Хүнсний хувьсгал”-ын цэс нэмэгдлээ. Өнөөдрийн байдлаар “E-Mongolia” системд төрийн 86 байгууллагын 1252 үйлчилгээг нэвтрүүлсэн бөгөөд 1.9 сая хэрэглэгч идэвхтэй ашиглаж байна. Тэгвэл “E-Mongolia” системийг идэвхтэй ашигладаг дээрх 1.9 сая хэрэглэгчдэд “Хүнсний хувьсгал”-ын мэдээ, мэдээлэл шууд хүрдэг боллоо.
Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, “И Монгол Академи” УТҮГ-ын захирал Б.Мягмарнаранг хүлээн авч уулзаж, “E-Mongolia” системийн шинэчлэл болоод хамтран ажиллах талаар санал солилцсон юм.
Иргэд “E-Mongolia” системээс өөрийн хувийн мэдээлэл авахаас гадна аж ахуйн нэгж, хуулийн этгээдийн мэдээ, мэдээллийг авах боломжтой болсон. Тухайлбал бизнесийн салбарын үйлчилгээг цогцлоосон E-Business, Оюутан залуусыг дэмжих ажлын хүрээнд “Оюутан танд”, Хүүхэд хамгааллын чиглэлээр E-Kids зэрэг цэсийг тус тус нэмсэн бол энэ удаа Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний явц, хэрэгжилт, үр дүн, үйл явдлын бүх мэдээ мэдээллийг багтаасан “Хүнсний хувьсгал” цэс нэмэгдэж байна.
“E-Mongolia” төслийг 2019 онд санаачлан хэрэгжүүлснээр иргэдийн хамгийн их авдаг 23 байгууллагын 181 үйлчилгээг гар утаснаасаа авах боломжтой болсон. Үүнээс хойш дөрвөн жилийн хугацаанд 86 байгууллагын 1252 үйлчилгээг цахимаар авах боломжтой болж өргөжжээ. Өнөөдрийн байдлаар “E-Mongolia” систем 1.9 сая хэрэглэгчдэд 57 сая удаагийн үйлчилгээг амжилттай үзүүлсэн байна.
Холбоос: https://e-mongolia.mn/Home
