Монгол Улсын Ерөнхийлөгч У.Хүрэлсүх өнгөрөгч зургаадугаар сарын 23-26-ны өдрүүдэд Бүгд Найрамдах Узбекистан Улсад төрийн айлчлал хийсэн билээ. Ерөнхийлөгчийн айлчлалын үеэр хоёр орны Төрийн тэргүүн нар Монголоос Узбекистаны зах зээлд болон тус улсаар дамжуулан Төв Азийн бүс нутгийн бусад улс оронд ноос, ноолуур, арьс шир, мах, махан бүтээгдэхүүн нийлүүлэх, Узбекистанаас жимс, жимсгэнэ, хүнсний ногоо импортлох чиглэлд хамтран ажиллахаар болсон.
Энэ хүрээнд Монгол Улсаас 100 мянган амьд мал экспортлохоор тохироод байсан билээ. Монгол Улсын Ерөнхийлөгч У.Хүрэлсүхийн айлчлалын дараа ХХААХҮ-ийн сайд Ж.Энхбаяр тус улсад зохион байгуулагдсан “Далайд гарцгүй орнуудын хүнсний аюулгүй байдал, тогтвортой хөгжлийн зорилтууд” дээд хэмжээний чуулганд оролцох үеэрээ амьд хонины экспортын хэлэлцээрийг баталгаажуулсан билээ.
Хоёр орны Төрийн тэргүүний тохирсон хэлэлцээр албан ёсоор ажил хэрэг болж Монгол Улсаас Узбекистан Улс руу 12 дугаар сарын 21-ний өдрөөс хойш хоёр удаагийн нислэгээр 1440 амьд хонь тээвэрлээд байна. Ерөнхийлөгч У.Хүрэлсүхийн төрийн айлчлалын үеэр яригдсан асуудал ажил хэрэг болж эхэлснээр Монгол Улс Азийн улс орнуудтай хөдөө аж ахуйн салбарт хамтран ажиллах, худалдаа, эдийн засгийн хамтын ажиллагааг өргөжүүлэх, амьд мал экспортлоход чухал ач холбогдолтой болж байгаа юм.
Монгол, Узбекистаны худалдааны эргэлт 2023 оны байдлаар 10 сая ам.доллар, нэр, төрөл нь цөөн хэдий ч цар тахлын үеэс хойш тогтмол өсөж байна. Манай улс 4,6 сая ам.долларын үнэ бүхий хонь, хурганы боловсруулсан арьс, өлөн гэдэс, хонь, ямаа, үхрийн хөлдүү мах зэргийг экспортолж, Узбекистанаас 5,4 сая ам.долларын үнэ бүхий усан үзэм, жимс, хүнсний бүтээгдэхүүн, хөргөх, хөлдөх цахилгаан төхөөрөмж, ачааны автомашин импортоор авчээ.