Монгол Улсын Ерөнхийлөгчийн санаачилсан “Хүнсний хангамж, аюулгүй байдал” үндэсний хөдөлгөөний хүрээнд Монгол Улсын Ерөнхийлөгчийн Үйлдвэр, үйлчилгээний бодлогын зөвлөх Ч.Даваабаяр, Ерөнхийлөгчийн Тамгын Газрын Хүнсний төсөл, хөтөлбөрийн албаны дарга В.Мөнгөнсүх нар ШУТИС-ийн харьяа Хүнсний эрдэм шинжилгээ, судалгааны хүрээлэнд ажиллалаа.
Тус хүрээлэн Монгол Улсын Ерөнхийлөгчийн санаачилсан “Хүнсний хувьсгал” үндэсний хөдөлгөөн, УИХ-ын 36 дугаар тогтоолын хүрээнд байгуулагдсан бөгөөд хүнсний аюулгүй байдлыг хангах, хүн амын хоол шим тэжээлийн хэрэгцээг хангах, шинжлэх ухаанд суурилсан хоол шим тэжээлийн боловсрол, мэдээлэл бий болгох, шинэ бүтээгдэхүүн хөгжүүлэлт, инновацыг бий болгох зэргээр ажиллаж байна.
ШУТИС-ийн дараах таван хүрээлэн Шинжлэх ухаан, технологи, үйлдвэрлэлийг хөгжүүлэхэд чиглэсэн эрдэм шинжилгээний ажил гүйцэтгэх, инновацыг үйлдвэрлэл практикт нэвтрүүлэх, шинэ технологийг дамжуулах, сургалт, судалгаа, туршилт, зохион бүтээлтийн ажил эрхлэх зорилготойгоор үйл ажиллагаа явуулдаг байна.
ШУТИС-ийн харьяа хүрээлэнгүүд:
- Хөнгөн үйлдвэрийн судалгаа хөгжлийн хүрээлэн
- Уул уурхайн хүрээлэн
- Ой модны сургалт, судалгааны хүрээлэн
- Дулааны техник, үйлдвэрлэл экологийн хүрээлэн
- Хүнсний эрдэм шинжилгээ судалгааны хүрээлэн
ШУТИС-ийн Үйлдвэрлэлийн технологийн сургуулийн захирал Ж.Туяацэцэг:
“Их сургуулийн бүтэц зохион байгуулалтыг зах зээлийн нөхцөлд зохицуулан өөрчилж, сургууль, профессорын баг, судалгааны төвийн бүтцийг хэрэгжүүлсэн байна. Судалгааны их сургууль болохын тулд их сургуулийн бүтцийг дэлхийн жишигт ойртуулж, сургалтын чанарыг дээшлүүлэн, судалгаа шинжилгээний ажлын цар хүрээ, үр өгөөжийг нэмэгдүүлж дотооддоо хүнсний бүтээгдэхүүний чанар шим тэжээлийн судалгаа хийх зорилт тавин ажиллаж байна”.
Мөн цаашид Хүнсний эрдэм шинжилгээ, судалгааны хүрээлэнгийн үйл ажиллагааг дэмжих, чадавхыг бэхжүүлэх зорилготой Японы Жайка байгууллагатай хамтран ажиллах төслийг танилцуулан боловсон хүчин, хүний нөөцийн асуудлыг шийдэн, техник тоног төхөөрөмжийн шинэчлэлтийг хийх шаардлагатайг онцолж байв.
